2012年1月4日 星期三

我來自江湖

CK老闆由講個信字 延伸至謊言最動聽 ,講既都係老闆鐘意點樣的人做親信,又或者點樣先可以做老闆既親信,佢講既野我係好認同的,但CK老闆係中環做大生意講說話文縐縐,而我其實係來自江湖的工業村小小小老闆,所以就返自己地頭講下自己既想法(要返自己地頭講野了喎!梗係有啲意見不同啦!嘿嘿,幸好都係啲細眉細眼野。)

CK老闆所講既親信,我稱之為頭馬,要成為老闆的頭馬第一關同能力、樣貌等等內在、外在的質素一點關係也沒有,剩係講個緣字,好似好玄但就係事實,廣東有句俗語叫‘人夾人緣‘就係咁解。所以我認為信任係冇得爭取嘅,要爭取既係畀老闆觀察你的機會,即係留響老闆身邊的機會,呢個係第二關。我認為要過呢關其實唔係「send左個message俾老細,話佢知,你會at least 願意企果邊,他朝要搵自己友既話,不妨考慮一下我。」而係響適當既時候話畀老闆知一啲其他同事仲未發覺既佢的特質,喜惡又好,嗜好又好,技能又好…用以証明你的洞察力,對老闆的細心,過咗第二關的話,即使冇第一關的幫忙相信都經已係二、三班馬了,事關老闆會樂意留低啲對佢'用心'的伙計響身邊。

要想由二班馬升任至一班,需要多啲耐心同一個契機,耐心係畀時間老闆認同你的忠心,契機係一個幫老細搵人上刀山落油鑊的機會,你冇睇錯係揾人而唔係自己上刀山落油鑊,要記住頭馬得一個,而鑊就成日有,剩係識得自己揹鑊既話,老闆又點會揾你做頭馬呢?!有啲老闆會覺得識咁做的伙計已經唔錯,但對我來講呢種伙計頂籠係二班頭,頭馬應該係不傷一人一馬都能拆咗隻鑊的人。

20 則留言:

  1. 哈哈,好好好......我唔係老闆,但我覺得你講得真的好正確,皆因我係一個跟左老闆打天下幾十年的"老屎忽"!


    fairy

    回覆刪除
  2. 一切榮耀頌讚與權能,都歸給老闆。

    回覆刪除
  3. "頭馬應該係不傷一人一馬都能拆咗隻鑊的人。"

    Good Point

    回覆刪除
  4. 人夾人緣好多時其實係關工作處事既理念同睇法;要嚴重啲講,直頭係關個人價值觀添!

    曾經上過九形人格既堂,講唔同性格既人,就算僱主好人下屬亦精明能幹,都唔一定可以做到好既配搭,簡單如寧願有啲錯但先做左件嘢send出街,定等耐啲做好啲,寧願遲少少但件嘢要100%啱先send出街...兩個理念都冇錯,响唔同時空都可以work,但就唔可以共存。

    當然,你永遠都可以講,揾個做得又快又可以做到件嘢100%啱既頭馬咪得囉...但,咁易揾咩!

    回覆刪除
  5. 我睇到一舊雲,因為我成世都未做過老闆,又未做過人頭馬(haha,人頭馬)!

    回覆刪除
  6. 米兄:請留意人夾人緣只不過係第一關咋!過咗第一關第二關就慳水慳力,直踩第三關,但好多時人們都係因了解而分手嘅。老細搵頭馬係尋尋覓覓,伙計搵好老細都係尋尋覓覓,同搵個好老公、好老婆一樣咁難架!因為都係搵伴侶呀!一個係工作的伴侶一個係生活的伴侶。老細伙計情和愛情、友情一樣都唔係一生一世架!我認為人世間只得一種情係一生一世永不離棄的,那就是親情。

    又:無論係作為老闆或伙計我係接受唔到自己明知有錯都send件野出街先嘅。如果我老闆堅持要咁做我會另謀高就;如果我伙計堅持咁做我會請佢另謀高就。

    回覆刪除
  7. Hana:
    看了你和CK老闆的文後,
    深感我如遇到你們是我老闆就好了,
    我是一個要100%啱先send出街的人。
    (我的公司屬小型公司,我做產品設計和
    部份電子工程另加包裝設計、
    說明書排版、絲印稿,一腳做)。
    但我不會把日間可以完成的事情,
    拖至放工後來做的人,
    我經常沒有準時收工,
    但一般不會超過延遲半小時收工。
    我覺得人生不只是單一工作,
    還有其他許多豐富自己生命的事需要做,
    但我公司有另一人做(Purchasing) ,
    每一個返工的日子,
    都起碼會延遲一個半小時以上收工,
    我們是一星期五天半工作日,
    但星期六她會帶中午飯來吃,
    是否真的那麼多工作做?
    當然不是啦,
    其實老闆在時扮勤力,
    老闆不在吹水不抹嘴,
    煲電話粥講事非長期長有,
    靈敏度极高,
    一听到老闆的腳步聲即收線,
    老闆的腳步遠離電話粥繼續,
    唯恐天下不亂,正日搞事搞非。
    她用時間來抗衡你的才能!!!
    在我們老闆的心目中時間是工作好的標誌。
    老闆自己早過員工返工,遲過員工收工,
    星期六和星期日也必到公司。
    我在此公司做了很多年了,
    我好想離開,但:
    1>很多年服務金一無所有。
    2>此份工我好有興趣熱情做,
    每當一個產品誕生,
    好像一個baby出世,
    都帶給我好大的滿足感!

    Hana:我信“人夾人緣”我公司也在火炭,
    好多時好想“撞”到你。呵呵。

    另一文我也好認同:
    http://wong625.mysinablog.com/index.php?op=ViewArticle&articleId=3329416

    Lucy

    回覆刪除
  8. >無論係作為老闆或伙計我係接受唔到自己明知有錯都send件野出街先嘅。如果我老闆堅持要咁做我會另謀高就;如果我伙計堅持咁做我會請佢另謀高就。

    所以你咪咁成功囉!

    或者大家真係行頭唔同...簡而言之,我做開嗰啲product,好難一啲錯漏都無(話俾你知由一開始設計,成幢樓一啲要執既地方都冇,你都唔信啦~);如果真係堅持所有嘢都100%無錯先出得街,其實係唔駛起~

    回覆刪除
  9. Lucy,我諗你好難“撞”到我啦!我係神經刀返工時間無定風向,好似今日七點幾返工,但太凍又好眼瞓,+點已經返咗屋企大覺瞓,而且我一星期有幾日下届走咗去教琴,又有幾日返咗大陸。

    回覆刪除
  10. 米兄:「如果真係堅持所有嘢都100%無錯先出得街,其實係唔駛起」

    明解。

    我想講呢個世界好多野其實唔係冇錯即係啱曬,對好多人來講答案只有yes or no,但其實仲有It's ok既,好似我今日泊個L位,泊幾次都泊唔好,結果我咪由佢閘界囉!對好多追求完美的人來講係好碍眼接受唔到!但咁樣又冇違例,對我來講係It's ok!我唔會盲目追求very good,追求100%XXX既人係會辛苦啲嘅,因為世事不如意十之八九呀!

    通常追求完美的人係比較易患上心理疾病嘅。

    回覆刪除
  11. 我想講呢個世界好多野其實唔係冇錯即係啱曬

    ==> 讚成!我以前做人好鬼執着,唔係黑就係白,追求完美,好辛苦!近年先醒咗少少,但仍有好多野未改倒,希望 as time goes by 我會做得到。

    回覆刪除
  12. 係架,有好多以為係錯嘅其實只不過係冇咁好或唔夠好遮嘛!

    回覆刪除
  13. To Lucy:

    我的回應──啱聽就聽,唔啱聽就請當我發up風算,希望你唔好介意:

    http://ricemixup.wordpress.com/2012/01/06/%E6%89%93%E5%B7%A5%E7%AF%87/

    回覆刪除
  14. To 米:
    在你的『屋企』有看到「打工篇」,又在Hana『屋企』看到你給我的留言,就在此回復你。
    米:首先想說我完全唔介意,每個人都有自己的觀點和角度來看問題,沒有惡意中傷的成份,拿出自己的所思所想,討論生活或工作的方方面面,其實也是一件“樂”事!在你『屋企』看了你的「打工篇」,那句『想回應入面既Lucy既留言』我還真有點兒感動呢!

    在Hana這篇我來自江湖上面我的留言,其實我主要想帶出的信息是:每一個打工者本身的工作態度、能力、和處事方法;在遇到不同的老闆對待員工的工作態度、能力、和處事方法,命運將會改寫,所以我說我信Hana所講的“人夾人緣”。

    至於「我是一個要100%啱先send出街的人。」這一點。我只是想說出我的工作態度。如果以主要討論「我是一個要100%啱先send出街的人。」這一點。也正如你說的或者大家真係行頭唔同...
    我所講的要100%啱先send出街,也正如Hana所說,不是盲目追求very good,但起碼係It's ok,過到自己心理一關,如寧願有啲錯但先做左件嘢send出街,首先模房師傅很困擾,畢竟一塊鐵不是一張紙,就算夾硬開出一套模,一上塑膠機啤貨,沒啤到幾萬就出事,這就要歸功於一個不成功的設計。我所設計的產品會當作一個Baby,從受精的一刻開始,每一部份賃自己的能力和工作經驗思考周到,不想中途出錯而導至難產,生出一個奇異不健康的Baby。所以「我是一個要100%啱先send出街的人。」不一定完美,但起碼追求85%以上的成功!

    至於究竟工作既滿足感重要啲,定係錢重要啲?這個問題也許要根據不同的年齡、不同的環境、不同的人生觀、不同的欲望追求、不同的身體狀況,而深思熟慮!說真我還沒慮出一個結果。

    Lucy

    回覆刪除
  15. hana 你唔好教琴啦,搞EQ班啦我第一個報名!

    回覆刪除
  16. 哈哈哈。。。超级认同那个‘人夹人缘’!写的好!

    回覆刪除
  17. Hi Hana, I sure regret for not learning Chinese when young, ha ha.
    You have a nice day, and keep a song in your heart.
    Lee.

    回覆刪除

淡极始知花更艷,愁多焉得玉無痕。

Related Posts with Thumbnails