盛夏交叉博

窗外落緊熱帶氣旋大驟雨，雖然是下午四點，但成個天已經黑哂！ 一個淺綠色的百佳膠袋剛巧在窗外一百碼以外飄舞。 呢個橫風橫雨的畫面，令我諗起一年前初夏一個星期日的下晝。

當時，妳返嗰份工需要經常往返大陸，我約妳都約咗好耐，但係仲排喺隊尾。 大大話話都等咗成個月，妳終於話俾我聽星期日下午四時至六時有一個空檔， 想要搵人陪吓攝時間，問我願唔願意被攝？ 我記得我喺電話旁大嗌三聲：「好！好！好！」
第一聲是告訴妳：「好！我願意！」、
第二聲是告訴自已：「好！我終於等到！」、
第三聲是我想身邊的路人都知道：「好！我真係好開心！」。

雖然下著大雨，3:45分我已經抵達目的地，是旺角新世紀廣場的帝京酒店coffee shop。我離遠望著coffee shop的入口，等待妳的到臨。 妳穿著黑色短袖T-shirt，坐低之後，妳叫了一杯涷咖啡；
話題開始了，妳講了很多大陸見聞，都是我前所未聞，好像劉姥姥遊大觀園。 不能搭上一句半嘴，我只有默默點頭和剩聽的份兒。 其實望著妳，入到耳入到腦的說話不足20%。 妳的眼神中流露出一絲蔑視，點解面前呢個男人如此無內涵？ 偶爾藐藐嘴，我只好阿Ｑ地當作是微笑！

雨一直下，妳望手腕上的手錶，夠鐘赴下一個約會， 妳說要結帳，是時候把對話結束。 好像心理醫生的診斷時間終止，叫醒睡在貴妃椅上的病人。

我堅持要送妳去的士站，雖然妳拒絕， 步行去的士站的同時，我替妳的別去，如穿梭機起飛般，作最後倒數。 抵達的士站，妳臨上車的時候，在毫無先兆下，突然轉身輕吻我右邊的臉，是一個點水式的Goodbye Kiss！可能是答謝我請客的那杯涷咖啡。 中了頭獎得意忘形到不知如何反應？只呆立望著的士駛遠。 一個淺綠色的百佳膠袋被風吹到我身邊而清醒過來。

一年後，妳仍然每天都很忙，或者妳已經忘記了我是誰， 偏偏窗外一個淺綠色的百佳膠袋，又勾起我許多許多．．． 記起當時妳上車的背影， 記起當時我面頰是如何燙熱。