2010年1月25日 星期一

風光不再

H:嘩!啲樓賣得咁貴,癡線!邊個買得起喎!

B:大陸新貴囉!不過你哋啲做廠嘅都唔錯呀!以前新界啲獨立屋俾你哋掃曬咁制。

H:你都識講以前啦!今時不同往日啦!加做廠真係冇咩肉食!你睇我間廠一年做幾億生意淨利得啲啄咁多。

B:咿,點解嘅?生意冇少到喎?

H:托賴,此消彼長之下生意真係冇少到,但近幾年大陸取消咗好多稅務上的優惠,又左加右加增加咗好多各種名義的徵費,單係哩啲徵費我已經要俾多幾十萬出來,講緊嘅係每個月啊!

B:咁又真係幾乸利喎!

H:咪係!好似我咁唔太老實嘅,識得投機倒賣下叫做守得到8~10%的淨利,其他默守成規嗰啲前輩都係揾得5~6%咋!

B:咁少?買樓收租咪總好?唔使勞心勞力之餘,回報都係咁上下喎!

H:係!買甲級寫字樓和地鋪收租,回報總高好多添啊!

B:咁,你總做?

H:回報少但穩陣吖嘛!總有我份糧都唔少嘛!偉大啲講都叫對個社會有貢獻吖嘛!話曬都養咁大棚人啦!

B:係了,多數都係男人做廠,好少廠姥喎!女人做廠有冇咩唔方便、唔同?

H:又冇喎!都係做野啫,我諗唯一唔同嘅係我個秘書係男人囉!

B:其實我想問你好耐了,查實點解會請型男Tim做秘書嘅?佢似老闆多過秘書喎!

H:嘿嘿...哩個係我獨門秘技,啊呀!開市了,得閑先話過你知。

B:又話戒短炒,皈依價值投資嘅?講埋先啦!

H:嘻嘻...戒咩都要慢慢來嘛!一啖係食唔出個大肥佬嘅。係咁先。

4 則留言:

  1. 哈哈,一啖係食唔出個大肥佬嘅...

    一晚征伐都係唔會走出個瘦骨仙嘅!

    回覆刪除
  2. 超鐘意呢句組 "一啖係食唔出個大肥佬嘅"

    回覆刪除
  3. 小瓶:(學下你男友去咗個'子'先)佢係權相佑和孫紅雷的混合體。

    校長:咪指桑罵槐啦!睇開啲啦!

    老麥:要自圓其說嗰陣我成日攞哩句來做擋箭牌...

    回覆刪除

淡极始知花更艷,愁多焉得玉無痕。

Related Posts with Thumbnails