2008年9月3日 星期三

臺妹小玲

「依家幾點呀?哇,十點半嗱,忙到唔知時間添!」當我望向大門時,就見到有三個人企左响度,兩男一女。其中一個男仔向我豎起三隻手指,然後我就帶佢地去左一張枱,佢地坐好後我就放底個menu,然後我又繼續做野。

我認得呢三條友,佢地成日都黎飲嘢既,臉圓圓果個就有D似某個男歌手,而個女仔就好似係另一個瘦蜢蜢好斯文嘅男仔嘅女朋友,不過果兩個男仔就黎得密D,我試過一個星期內見到佢地黎五次,睇怕佢地都係上左茶癮。

隔左一陣,我就埋去同佢地落單。其實果兩個男仔想飲D咩,我都心裡有數,肥哥哥會叫杏仁奶荼,而另一個瘦蜢蜢嘅就會叫蜂蜜奶綠。果然不出所料,佢兩個真係叫杏仁奶荼同蜂蜜奶綠。而個女仔,就比較鍾意試新野,最後就佢叫左杯蘋果綠荼。

一路以黎,我都有發覺好多男仔客會將佢地既目光集中喺我度,講真,初初我真係覺得有D唔自然架,因為我唔知道我塊面係咪污糟左,抑或我條褲爆左呔或者走光自己唔知,所以我會成日check下自己條褲,睇下自己有冇出醜。而果個臉圓圓有D似蘇永康既男仔,我發覺佢都有成日望住我,感覺怪怪咁。不過,久而久之就習慣左,我都唔會理佢地囉。

都曾經聽過有人話我個樣似香港一個女歌星,不過我又唔係好覺。雖然我個樣睇落都唔錯,但係我邊有佢咁靚丫。

不過我又發覺瘦蜢蜢有女朋友果個男仔,都好似成日望住我喎,但係佢女朋友睇落又好似唔係好介意咁,唔通佢地係扯皮條睇中左我?都係安全D,打定電話叫男朋友接我放工先。

臨近中秋,記起老闆Josh叫我地班waitress落力D sell月餅,於是我走理去呢枱,向呢三個男女推銷我地既月餅。

講完一輪後,就只得個女仔同我傾,而果個肥哥哥,就好似儍儍地咁望住我。最後,佢地買左兩盒月餅,响個臉圓圓既男肥哥哥俾錢我果陣,佢臉紅紅口震震咁同我講左句唔該。我忍住笑,其實佢地都幾nice丫,個女仔跟住問我叫咩名,我禮貌地答佢「小玲」

一輪應酬後,我就轉身繼續Sell月餅,不過我隱約聽到個女仔講「佢叫小玲呀,聽唔聽到呀…」
呢次我真係笑左出黎,從呢日起,我就識左呢兩男一女。


以後既日子,佢地都有成日黎飲野,當我冇咁忙既時候我都會同佢地傾下偈。個女仔比較好傾D,可能果兩個男仔怕羞啦。不過,有時佢哋high high地都會借D意讚我靚。「哼,使乜講!」我心裡咁諗,不過口裡就話「邊係吖」。

幾年後,我決定重返校園,希望可以揾份唔同性質既工,不過我仍有返茶鋪做兼職。响開學頭個禮拜,有日放學時,見到一個熟悉既身影向門口嘅方向走。冇錯,佢就係臉圓圓果個肥哥哥。於是我就跑過去,喺佢後面拉住佢個書包。佢擰轉頭見到我時,就呆左一呆,然後又口震震咁話「小玲你又喺度返學牙?」我笑笑口話係。佢問我點返屋企,我話我要搭巴士,於是佢話車我,我話好。

喺車上,我講左D關於我自己既嘢比佢聽,可能我覺得佢係一個幾好嘅聆聽者,佢成日唔聲唔聲咁,或者佢可能驚住講野又口窒窒啦。最後,佢都有講左D佢既野比我知,佢仲有一年就畢業,平時鍾意睇下D哲學書咁。佢話佢响學校租左個Locker可以同我share,我梗係求之不得啦,慳錢之餘又唔使拎住咁多野上堂。

有時我發現佢會留底D字條响Locker度問下我點,當落雨唔記得帶遮時,佢都會特登留底把遮响Locker度比我,其實我覺得佢都幾細心。我生日果日,佢仲留底左件小禮物比我。根據女仔既第六感,佢應該係鍾意左我。

可能佢知我有男朋友,所以佢始終都同我保持一定既距離,啱時間既話佢就車我放學,我返工見到佢時就同佢傾多兩句。直到我畢業轉工以後,我地就少左聯絡Lu。依家,佢間中都會同我MSN flirt 下我咁,我咪笑下同佢傾下偈囉。

過左咁耐,唔知佢係咪仲對我有意思呢?


延伸閱讀:那一個夏天(3) By CK

4 則留言:

  1. 同CK玩網上文章接龍,一人寫一半「老作三分真」?又幾特別吖。

    當女神坐咗架條死氣喉粗到可以塞個菠蘿入去既跑車,男人對女神的幻想,就會從此消失。

    回覆刪除
  2. 李小龍:嘿嘿,篇文一睇就知唔係我寫啦!無啦啦有個署名肥哥哥嘅叫我幫手交叉博遮嘛!

    回覆刪除
  3. 仲想話寫得好有 feel, 讚下你添

    回覆刪除
  4. m30+,你讚佢都一樣遮。

    回覆刪除

淡极始知花更艷,愁多焉得玉無痕。

Related Posts with Thumbnails