2009年8月3日 星期一

投機、投資雜談(四)

【股夾人緣】

兩隻行業、性質相近的股票,其中一隻個人會感覺零舍好炒,掂親都係賺的居多,特別是短炒的類別。就好似人咁,某些會和自己特別投緣,我稱之為股夾人緣。

例如:內銀股工行和建行,雖然1、3、9、8哩幾個數字同我特別夾,939建行和1398工行性質相近,但唔知何解次次炒1398就斬獲不菲,939掂親都冇乜肉食,但對好多股民來講939係好炒過1398嘅,做人嘅野最好順勢而行,人哋炒939賺到飛起,係人哋嘅事,1398旺我多啲咪親近佢多啲囉!講起來好似好迷信,但卻是事實喎!有時都有啲撓頭!

【再見亦是朋友】
人人都話唔好同股票談戀愛,我就話同心儀的嗰幾隻股票拍下散拖交下心都冇壞嘅,就算短炒最好都唔好一夜情咁短囉!一夜情就算搞得幾high都係high得嗰一夜遮。賺到錢的股票就好像搞得係好舒服的性伴,hold耐少少深入淺出了解多啲,長炒長有都幾好啊!至少唔使擔心惹埋啲咩世紀絕症一鋪清袋嘛!股市一路以來都是上上落落咁走過來的,低買高沽是賺錢的不二法則,所以即使分咗手都唔好將啲個股當作垃圾拋諸腦後,老死不相往來,要再見亦是朋友,時時留意這些個股的動向。時機一到又可以再舊情重聚大戰三百回合,話哂炒生不如炒熟吖嘛!知頭知路又知底,點都好過盲蹤蹤聽啲財演吹雞啊!

【鬆綁莫急走】
炒股票的人多多少少都試過做咗大閘蟹,初哥和虧損嚴重的通常都唔會止蝕,當千等萬等等到花也謝了終於鬆綁時,多數都會急不容緩咁啦啦聲放咗隻股票,點知一放就後悔,因為隻股通常又會繼續再升。我的經驗是閘住好耐的股票浮面,通常會破位爆上,所以唔應該即刻沽售,進取啲反而應該加碼溝濃,當然高回報一定係高風險的,所以如果想保守啲,先沽一半存貨都冇壞嘅,起碼可以瞓得安穩啲。

12 則留言:

  1. 感覺好似講賭錢,買馬仔咁,哈哈。

    短炒果然如賭博。

    回覆刪除
  2. 搞得係好舒服的... 至少唔使擔心惹埋啲咩世紀絕症...

    嗱嗱嗱,咁就唔係正確既知識同態度勒。

    回覆刪除
  3. 若虛 :短炒=投機=賭博,少啲心血都唔易為,錢有邊啲係真正容易賺格呢?

    C.M. 哥哥:女人唔同男人好多時冇理智唔會理咩正确既知識同態度,舒服就得格了。

    回覆刪除
  4. 果然高風險,高回報...

    (查實唔係想寫“正確”,而係“安全”)

    回覆刪除
  5. 嗱、嗱、嗱,做咩口不對心先?唔通...

    回覆刪除
  6. 咪就係因為就快七年囉...

    回覆刪除
  7. 七年又真係...啲嘅,唔怕男人總有對得住天地的"曖昧"

    記唔記得兩年前篇"曖昧"吖?

    回覆刪除
  8. 啊呀!我都係言不由衷。

    回覆刪除
  9. 呵呵,股夾人緣,想入非非!

    回覆刪除
  10. 現在不知還有沒有升市的空間呢?!

    回覆刪除
  11. 老散總未大舉入市,冇點心啲大鱷咪白做?

    回覆刪除

淡极始知花更艷,愁多焉得玉無痕。

Related Posts with Thumbnails