2010年11月16日 星期二

我為什麼不討厭李嘉誠

一.發水樓

我前前後後買過不少樓,但從沒買過長實系的樓。買樓不是小事,事前必先做很多功課,地區、樓齡、發展商、物業類型、校網等等都需要做詳細的資料收集。當然我買第一層樓的時候就知道新樓漂亮、豪華但實用面積小,管理費貴但升值潛力高,而且無論有沒有買樓經驗的人很多都知道新地、恆基的樓質量最好,華懋的最差最多漏水的,其次是長實樓質量麻麻之餘屋苑的煤氣、電訊、寬頻還有捆綁消費(我聽過不少看更、清潔阿嬸、侍應如此評論。)另外只要你不是去長實的新樓盤看房的話,幾乎所有的地產經紀都不會強推長實樓的,相反推荐新地樓的就有不少。

綜合以上各項我對華懋、長實的樓一點好感也沒有,所以從來都沒買過長實的樓,而且我買樓傾向於實用率高、樓齡中等、管理費便宜(沒有超豪會所)的,沙士其間買的樓都是這種類型的,雖然如果當時買了新樓(發水樓)的話升幅更驚人,賺得會更多,但我也沒後悔過,因為我選擇了不讓發水樓先賺我的錢。李嘉誠的發水樓對我沒影響,所以我不討厭他。

二.賺到盡

很多人都說討厭李嘉誠是因為他衣食住行瓣瓣都沾手賺到盡,我不覺之餘還覺得有些服務很便宜。我住新界,避用了他旗下的公用公司,至於百佳和屈臣氏,便宜的話就去買,貴過別家的話就去別家買囉!香港除了超市和連鎖店還有很多藥房和辦館的呀!

再不然上網團購好了。做為一個持家有道應使得使的精明師奶,持華潤萬佳會員卡逢2、12、22號購物有95折;持恆生enjoy卡 在惠康逢3、13、23號購物95折,在萬寕逢5、15、25購物95折,在7-11逢8、18、18購物有95折,這些優惠日期我是記得很清楚的。別說因為樓下、附近只有百佳、屈臣氏好不好?人家住在深圳因為便宜都來上水買洗頭水了,又要省時又要省力又要房子新(要買/租了長實樓才有機會附近只有長實系的零售店吧?!),一邊自動自覺幫襯他一邊罵他賺到盡?

直線電話我用和記環球的,和電盈的質素沒什麼分別,才幾十塊一個月,價錢很相宜,真的不覺得賺到盡喎!另外和記有個每月$56元任打的0088長途電話服務,真的是幾仟上萬分鐘的任打,而且話音清晰,我用了兩年多,其間只加過一次幾元的價,這個我是覺得非常非常超值的。所以我真的不覺得李嘉誠賺我的錢是有(能?)賺到盡的。

三.對錢的態度

很久以前,當我還沒什麼賺錢能力的時候就聽過這樣一個小故事:「一次在取汽車鑰匙時,李嘉誠不小心丟落一枚兩元硬幣,硬幣滾到車底。李嘉誠怕汽車發動後,硬幣會掉到路邊的溝裏,就趕緊蹲下身子去撿。這時,他旁邊的一個印度籍保安看到,幫他拾起了硬幣。李嘉誠收回硬幣後,給了保安100元作為酬謝。李嘉誠說:“如果我不拾這兩元錢,讓它滾到坑渠裏,那這兩元錢便會在世上消失。而100元給了保安,他可以拿去用。我覺得錢可以用,但不可以浪費,如果你輕視錢,錢也會輕視你。”」

這個流傳已久的故事真确性有多高,我沒去理會,重要的是從此我對金錢有了正面、積极的態度,不輕視任何一個攢錢機會,既便累得要趴下了還是擦一擦白花油頂硬上繼續努力地工作,珍惜每一個攢錢的機會,也不會讓人賺我的錢「賺到盡」去浪費。

題外話:要說討厭,我是很討厭李澤楷的,不為別的,只因8號仔當年令我輸了好幾萬塊...

32 則留言:

  1. 其實係近年才出現討厭李生的論調,與香港「貧者越貧、富者越富」不無關係。

    1. 「沙士」之後,香港由谷底慢慢向上爬,但過程祗有少數人可分享當中成果。
    2. 新生代係庇護下失去應有的磨練,加上經濟結構性轉型,造成機會求過於供。
    3. 眼見成為富人機會少,郤與富人距離越拉越遠,再加上有心人的興風作浪,便會不期然對富人產生「仇」嘅心態。
    4. 作為香港首富,自不然成為目標,甚麼「李氏力場」等相繼出現。

    我都並不是特別討厭李生,富人自有富人煩惱,尤記得老媽講過:「一個人幾有錢都好,咪又係訓一張床」。看來好像是「吃不到的葡萄」,但咁諗人咪會輕鬆一點,總好過計呢計路。

    回覆刪除
  2. 好佩服妳嗰堆95拆日期!師奶仔嘅數口真係唔講得笑,甘拜下風!!

    回覆刪除
  3. Jay ,我諗大陸'無啦啦'咁多人富起來了都有關係嘅。以前就算打份萬來蚊工的港仔去到上面都好似大爺咁,加就係人(大陸人)都話香港好燦。

    Ebenezer,總要睇下真係平先好落手,如果唔係好易因小(95折)失大(買貴)。

    嘿嘿...師奶仔係咁上下啦!

    回覆刪除
  4. 新地係好,恒益就麻麻。
    近年信和都唔差。

    長實應該會唔連到煤氣囉,因為係恒基嘅。

    (發水樓)
    未有什麼豁免時,好多人都知道太古城實用率高;好多人都知道單楝樓實用率低。這意味買家早就知道實用面積同建築面積係有分別。發水的發水部分就計咗落建築面積到,咁正常買樓點解唔睇埋實用面積呢。

    有啲人好得意,買幾球嘢貨乜功課都唔做,上屋宇署查圖則幾十蚊,咁都唔好查吓。我仲識啲人買一手樓花,連佢響邊都唔知就畀錢,你話佢可憐,我就話佢傻仔。

    仲有,計發水樓,有邊個唔發水,係咪淨係長實先有呢?什麼發得盡唔發得盡,只係五十步笑一百步。精明買家,一睇實用面積已經知乜事。

    (賺到盡)
    其實賺到盡係好合理,我求職時叫價都叫到盡。個一基礎下,大家都攞到盡,都係公平嘅事。到我每年續3嘅電話約,我都問優惠問到盡。你無叫價能力係你問題。

    同樣地,我想買得舒舒服服咪去百佳囉,我想平咪去藥房囉。你講賺得盡,CitySuper 咪仲賺得多,乜你唔知咩。又好老實,都唔係無人知長實樓樓下實有百佳屈臣氏,你咁唔鍾意咪唔好買長實樓囉。

    我以前公司都用和記寬頻,係我叫provider 報價後揀得,佢個plan 係5MB,但放畀我個bandwidth 有10MB。我每個月都check ,從來無少過。我都賺到盡o架,李嘉誠都無仇我呀。仲要,佢24hrs call on site service 快過 PCCW,3個鐘內上門,PCCW要一日。

    到公司fix lines, 找就用PCCW,因為佢平過HGC,每條線平4文,而且合約短6個月。

    我成日覺得,你叻咪你賺到人盡,你豬你咪畀人賺到盡囉。我好肯定,一百個人買樓,都無邊幾個除咗查冊之餘,仲查埋圖則自己計吓實用面積。

    係呀,我讀書讀過呀,投資嚟o架大佬,讀書除咗畀錢之餘仲要花精神心機。畀你讀完都有權唔識唔明唔記得。

    我實畀連圖則都唔識睇嘅人叻;我實唔夠做測量行業嘅人叻;一個做測量一兩年嘅人通常都唔夠做咗二十年嘅人叻。呢個世界永遠都係一級食一級。

    從來呢個社會都係競爭,你唔想畀人食,咪學多啲嘢囉。

    回覆刪除
  5. >新地係好,恒益就麻麻。
    我初初係香港買樓啲人係咁講嘅,信和真係唔錯!管理公司又幾好,最正係唔準養貓狗。(我成日都唔明點解啲人搬去講到明唔準養貓狗嘅屋苑然後猛咁嘈人哋唔畀佢養狗漠視狗權)

    回覆刪除
  6. (我成日都唔明點解啲人搬去講到明唔準養貓狗嘅屋苑然後猛咁嘈人哋唔畀佢養狗漠視狗權)

    係咁o架喇,輸打贏要!!!

    回覆刪除
  7. 花花,妳說得很好呀!不過,我同意Jay所寫的,李生只不過是一個"容易目標"。最大的問題是,機會向上爬變得越來越少,而香港亦變得「貧者越貧、富者越富」。

    香港人眼見的不公不只在發水樓或日常生活購物中,如花花所言,"我有選擇嘛。" 但例如MTR康城站呢?起得相當快,比起西環和南區的還要快。康城站有什麼優勢會值得有個起得咁快嘅MTR站呢?

    至於賺到盡,不說商舖因貴租捱不了時便要搬遷,這個可以明白。那天星碼頭呢?為甚麼要拆了這個古物?看看尖沙嘴那幢舊警署變了什麼樣的商場?這不關李生事,不過卻涉及政府和商家。

    所以港人不只仇商,還有仇政,是一塊兒的。

    題外話:

    例如MTR站裡的某杯麵廣告,我的天,當我行過的時候,它的宣傳句語會不斷在我耳邊重複,是噪音。當然,人們可以說,"你唔鍾意咪唔好坐MTR囉。" MTR該在每個站都安裝這個,由入站到出站都不停地播,因為要"賺到盡"。

    又,巴士那些黑廢氣真的很厲害,跟本避不了。當然,人們可以說,"你唔鍾意咪唔好落街/唔好坐巴士囉。" 巴士公司不該檢討這些黑廢氣,因為會浪費股東的資源,因為公司要賺到盡。

    註:這些都不關李生事呀。

    回覆刪除
  8. 當一間公司大到咁上下當一個人子又生子,孫又生孫時,便很難控制。管理跟做生意,不是同一回事。長實令我嘔電。

    李生是老一輩,他真的心懷慈善,但企業的社會責任不只是慈善救濟。

    不過在香港的富有華人,從這極有錢的李生,到有少少錢的乜生,都是這個mindset。做生意時零和遊戲,放下面具便是慈善救濟。右手跟左手可以不溝通。

    反而米高嘉道理家族的公司有多少少空間

    回覆刪除
  9. 嘿嘿唔敢講我想講乜了,唔係又有富豪話我有既定立場! XD

    回覆刪除
  10. 和你不同,我信佢兩父子唔過,所以當佢莊家搭棚炒股的態度來炒盈動,結果不但絲毫無損,仲賺到笑!

    回覆刪除
  11. 與虎謀皮:我嗰陣初涉股海唔識野嘛!要交學費嘛!

    老人:是但,我寫得出貼得上來都預咗啦!影響唔到我嘅。

    Anon ,如果事事都要咁諗的話其實去世界任何一個地方居住生活都唔會開懷!

    回覆刪除
  12. hkeric ,佢真係衰過佢老豆好多吖!

    70妹,我有個friend係0001入面高層,佢話大少對啲伙計刻薄過誠哥好多!啲老臣子個個都話誠哥好人!而且大少份人又唔够誠哥醒,誠哥老了嘛少咗打理間公司所以企業形像咪越來越差囉!

    過內人:其實我唔buy賺到盡!我自己炒股或做生意都唔會賺到盡,留啲水位畀人賺先有得輪轉嘛!


    Anon ,如果改變唔到環境又想轉變生活狀態咁唯有改變自己的心態和行為了。

    回覆刪除
  13. Anon:

    但例如MTR康城站呢?起得相當快,比起西環和南區的還要快。康城站有什麼優勢會值得有個起得咁快嘅MTR站呢?

    呢個問題就等如我兄長有乜優勢早啲見吓個世界。康城站就係地鐵車廠站,無記錯2006年已經動工。仲要,港島呢啲舊區新線同將軍澳呢啲新區新線,規劃時間同建築時間都有好大差別。

    尖沙咀的商場真係關李生事喎,點解唔關呀??Heritage 1881就係長實旗下嘅項目。

    我好少搭地鐵,但其實佢真係咁嘅話,你可以投訴。因為地鐵係壟斷經營,無得揀;你見九鐵都會有靜音車箱。

    要賺到盡唔係淨係安得多就得。地鐵所有廣告都係有間法國嘅國際性廣告代理精心策劃。

    巴士而言,又因為佢係壟斷,所以佢嘅排放標準係一直提高,你見有巴士出大黑煙又可以投訴。

    回覆刪除
  14. 唉,花花,我只係想講,香港人依家嘅仇商仇政情緒,唔係一面倒只係"輸打贏要"、"無去選擇"嘅原因。當中當然有人會乘機抽水,正如攞救濟金嘅都有騙子/懶人係入面。但係,係唔係就代表騙子多,定係大部份攞救濟金嘅人其實係真係有需要嘅人?

    西方所謂嘅"企業良心/文化"唔係空詞,而係每間公司都有一啲嘢,就算唔係犯法,係唔會去做。例如我舊老闆一開始就講明如果要去風月場所同人傾生意嘅話就一定唔接呢啲生意。而香港普遍嘅營商環境,上至長實下至大家樂,就被人一種賺到盡嘅感覺。商人賺到盡之餘,政府又坐視不理,先至會有近年嚟嘅負面情緒。講真,如果政府唔出聲,你估啲巴士公司會唔會主動去安裝新嘅排廢氣糸統?我敢打賭,巴士公司唔會去做,而受害嘅咪又係香港市民。

    令我諗起花花以前寫過嘅一句,大概係"有啲人無能力去向啲有能力嘅人開刀,咪唯有搵啲弱小囉。" 花花寫得無錯,有啲嘢係自己選擇,唔買長實樓係其中一種,但更多嘅係香港市民無得揀,例如廢氣、康城站、噪音。

    回覆刪除
  15. 非洲啲兒童都冇得撿!例如食唔飽、冇干淨食水...

    唉...

    回覆刪除
  16. 寫完先見到有回覆:

    嚴格嚟講我唔算係香港人,所以邊啲係長實,邊啲係XX,我唔清楚。我只係耐唔耐返吓香港,發現啲嘢越嚟越唔係幾對路咁解。

    MTR嘅嘢有法國嘅國際性廣告代理精心策劃又如何?我去過頗多嘅地下車糸統,MTR呢種咁嘅賺錢方法,係第一次見。可能我少見多怪,還望指正。你可以話呢種唔係噪音,所以我有啲希望MTR可以由頭到尾實行呢種賺錢方法,睇吓會有咩反應。可能係我反應大啦。

    窗台發水樓都係香港起頭而加以普遍。我見過一份文章(可能係假嘅吓),內容係講大陸嘅二線城市重慶都唔需要起發水樓去賺錢,內地人越嚟越睇唔起香港人。

    我係香港短短嘅時間入面,見過排黑廢氣嘅巴士數之不盡,就算係本土香港人自己都會掩鼻等過馬路。呢種情況一定一定唔係罕見。我想問,點解一定要我去投訴?點解政府甚至乎巴士公司自己唔去定期檢討?

    我試過,作為遊客,係香港用信用咭時,係我話明要擦港幣嘅情況下,商戶依然幫我擦外幣(當中佢地定係銀行會食我差價),唔止係一次嘅事。我試過投訴消委會,但佢地就話無嘢可以做到。投訴又可以點呢?我仲有嗰三張發票(寫明係港幣)係度,你幫我諗諗應該點做呢?我用嘅係美金,所以一直個FX rate係好穩定,一睇就知道單單係呢三個交易比香港嘅銀行食我差價,食水好深喎。我相信唔少遊客都會有類似嘅經驗,不過唔係個個會好似我咁細心去驗單先會發現。

    回覆刪除
  17. 花花,我同意非洲嘅兒童都無得揀。香港人算好幸福,至少佢地見到/覺得唔啱/唔係幾對路嘅嘢時都可以/會出聲。趙連海就連機會都無啦!

    社會有進步一定會有反對聲音,可能表達方法,甚至乎理據唔一定合情合理,有啲仲係抽水群眾。但係當聲音越嚟越大而且持久,背後嘅社會現象/原因唔應該輕易忽視,至少我認為係咁。

    買樓唔同買迷債,樓係生活一部份,會牽連民生水平。

    回覆刪除
  18. >內地人越嚟越睇唔起香港人。

    x2

    >重慶都唔需要起發水樓去賺錢

    大陸地方大吖嘛!同埋係重慶賣樓要單身証明或者結婚証,夫婦一齊簽名先得!香港就唔使囉!香港都有香港好嘅地方!

    回覆刪除
  19. 那個一蚊銀故事是真的。李嘉誠在港台"傑出華人"的節目中親口說的。

    回覆刪除
  20. >香港人算好幸福

    識得感恩好重要,人都開心啲。:)

    回覆刪除
  21. Jay 提到 "2. 新生代係庇護下失去應有的磨練,加上經濟結構性轉型,造成機會求過於供"

    我唔同意, 新生代面對緊上幾代冇面對過既問題, 佢地可能唔需要咁早出來打工, 有多D 機會讀大學, 但係, 咁係因為社會進步, 而家呢一代, 佢地有既係知識, 有既係技術, 佢地根本唔需要好似上一代咁"捱", 如果呢一代生活方式同30 年前既上一代一樣, 咁我地究竟有冇進步過?

    當上一代擔心兩餐果陣, 佢地既機會比我地呢一代多, 當然, 唔知道科技發明可以提升工作效率, 多左既時間可以做自己想做既野, 同時, 果陣既香港貧富懸殊冇而家咁嚴重

    但係呢一代缺乏既係機會。 唔好同我講 "成功非僥倖" 呢D 大道理, 當你真係成功果陣, 你就自然會想方法維持你既利益, 同時想方法唔好比其他人分享到你既成果 (即係剝削) ---- 以前呢D 事會唔會咁常見?

    回覆刪除
  22. To michigan_8_mile_road:

    我想講嘅係就算機會少左,但係唔係大安指意要人幫,又或者頼呢樣頼個樣?現在新生代嘅EQ其實都唔高,正正是環境太過comfort所致。

    回覆刪除
  23. 8mile:

    >佢地根本唔需要好似上一代咁"捱"

    有無想過點解佢地唔使「捱」(即係JAY所講的磨練)?如果機會少咗,係咪即係話佢地係要「捱」(包括做多D,想多D,肯冒險多D)? 一面話機會少, 一面又認為自己唔需要捱,唔係邏輯錯亂就係唔肯面對現實?

    > 唔好同我講 "成功非僥倖" 呢D 大道理

    係合理嘅,點解唔可以講?

    >當你真係成功果陣, 你就自然會想方法維持你既利益, 同時想方法唔好比其他人分享到你既成果

    咁請你自己又想想, 如果你成功, 你會不會都是做一樣的事? 為什麼人家要給機會其他人?

    現在公義和普世價值氾濫,將所有的事情想得理所當然, 得不到自己所想要的, 就埋怨別人, 是別人對他們不起.

    回覆刪除
  24. Anon,

    康城站係地鐵車廠,不論建站與否,鐵路都會接駁到那裡,讓列車回廠檢修。在這裡建站,費用相對便宜。發展西環和南區的鐵路系統費用極為昂貴,一公里要成50億。另外,在車廠上蓋建樓建站,讓賣樓收入補貼建鐵路的費用,是香港發展鐵路系統的模式。這就是康城站的優勢了。

    potato

    回覆刪除
  25. 剛剛睇到呢篇:
    香港作為第三世界


    內裡提到: "簡單來說,市民每天的生活怎麼過,除了口袋裏面有多少錢外,還包括住所的面積和環境、社區和自然環境的質素、公立教育和醫療的質素、社區休憩設施和公共空間、文娛康體活動、追求滿足個人興趣和發展的機會等等。這些都是人民生活質素的內容。

    上述種種對於一個仍未富裕的社會是有點奢侈,因此在這個時候強調經濟發展先行是對的,但到社會富裕時還頑抱著第三世界思維,就是不合時宜。"

    所以係我之前嘅回覆有"黑廢氣"、"噪音"。香港嘅情況唔同非洲、大陸,而我講話"發覺有啲嘢越嚟越唔對路",亦係用其他先進國家嚟比較,咁樣我覺得公平小小。

    要比人有種賺到盡"感覺"嘅公司,衰啲講句,黔驢技窮。就算係東京、紐約、倫敦、巴黎呢啲密度高嘅大城市裡面,都唔需要用發水樓去賺錢。

    回覆刪除
  26. Anon:

    嚴格嚟講你算唔算香港人,你唔清楚就先查清楚先講囉,唔通你係非洲人,錯嘅都變咗啱咩。

    我夠唔係美國人,我都唔會話美國總統係默克爾。

    MTR嘅嘢有法國嘅國際性廣告代理精心策劃又如何?
    就係佢唔會好似你咁諗,由入站到出站都不停地播,因為咁樣先唔可以賺到盡。
    我強調我無話呢啲廣告好好聽,但你之前話賺到盡就由入站播到出站,我認為一定唔係咁就可以賺到盡囉。邊度用平面廣告,邊度用聲畫廣告,做幾大,做幾密,都係有研究過。 當然,你又可以話:「我都唔係做廣告嘅,我唔知咁多。」

    重慶唔用發水樓去賺到盡,唔代表佢無用其他方法去賺盡。就算你證明到佢無發水,你同時亦要排除埋佢無用其他方法去賺盡,你所講嘅先可以成立。

    A搶劫,A不是好人。B這個強姦犯因為沒有去搶劫,所以他可以睇唔起A???

    政府甚至乎巴士公司....
    你又可以話你唔係香港人所以唔知,而家啲巴士已經去到歐盟五期(2009年標準),都好新嘅標準喇。九巴都準備引入電巴士喇。咁點解唔歐盟六,因為係2014年標準,生產商努力緊……

    咁你刷卡事件,作為香港人嘅我,我無用美金信用卡,真係答唔到你。

    買樓係同民生有關,但買樓都同投資有關。所以買樓除咗要考慮住的方面,亦要睇埋投資方面,某程度上比迷債更複雜。

    回覆刪除
  27. >係合理嘅,點解唔可以講?

    因為呢個道理已經比香港人嚴重扭曲, 有d 人既"成功" 只係兩餐溫飽, 唔係個個香港人都有咁強烈既物質追求, 要追求名利, 但係好多香港人, 要達到佢地既"成功" 已經好難

    要我唔相信"成功非僥倖"? 好難, 除非大多人都達到佢地想要既野, 重覆, 好多人既"成功" 並唔係你想像中咁難, 係一個社會制度健全既社會, 我想好多人早就已經"成功" 了, 佢地唔會停留係"食" 呢個咁基本既問題度


    >當你真係成功果陣, 你就自然會想方法維持你既利益, 同時想方法唔好比其他人分享到你既成果

    咁請你自己又想想, 如果你成功, 你會不會都是做一樣的事? 為什麼人家要給機會其他人?

    我會, 如果我好似你維護自己既利益, 咁呢個世界應該唔會有人拿諾貝爾獎, 更加唔會有人做到科學家, 當你想做科學家, 第一樣野想既唔係點樣發明, 而係, 你係抱住咩心態去做, 科學家最重要既係將佢既發明/ 發現公諸於世, 其次先係點樣"賺錢", 不過好多人而家都做唔到呢一點

    同埋, 科學家唔應該牽涉利益, 如果一個科學家靠賣藥去發達, 咁佢已經唔再算係一個科學家, 佢係一個商人

    我去天文台聽過一個講座, 關於去南極考察氣候問題, 講者話, 做呢d 研究唔可能同商業掛鈎, 支出都係政府/ 籌款而來。用環保做名義去賺錢, 係商人既道德問題, 科學家既出發點冇錯

    回覆刪除
  28. >有無想過點解佢地唔使「捱」(即係JAY所講的磨練)?如果機會少咗,係咪即係話佢地係要「捱」(包括做多D,想多D,肯冒險多D)? 一面話機會少, 一面又認為自己唔需要捱,唔係邏輯錯亂就係唔肯面對現實?

    科技既發展取代左人力, 所以工作機會一定係少左 (以前個個要下井耕田, 而家唔駛), 但咁唔代表我地一定要捱。如果我地識得善用科技, 同時將社會人力資源按需求重新分配, 相信好多人會有野做, 同時唔需要咁長既工時。你覺唔覺香港而家有d 工係供多於求(business 既行業), 有d 係反轉, 不過政府一直冇做野 (好似nursing)

    請你解釋下點解香港人既工時係全世界第3 最長, 但係工資又唔係全世界最高呢? 如果可以維持工資同效率, 但係減少工時, 我相信香港人會舉腳贊成

    回覆刪除
  29. 過內人,你講得無錯,我應該查清楚先講 1881。

    至於賺到盡呢樣嘢,非常主觀,無一個客觀定義。中國大陸我早就講明我唔清楚。我了解嘅只有美國樓房,應該無發水樓呢種玩意,而係新聞度亦從未聽說過美國人投訴發展商"賺到盡"。不過亦可能係每個國家嘅人接受能力唔同有關,亦可能係我見識少,美國可能有發水樓都唔定,歡迎賜教。

    至於你所講嘅巴士問題,我谷歌咗條link:

    http://www.slideshare.net/cleanairnetwork/2-nov-09

    先旨聲明,我無能力去考究究竟呢啲數據啱唔啱。不過,呢條link會對你所提及嘅巴士問題會有另一種睇法。我只係知道,我係京都同紐約都少見咁多巴士黑廢氣。先旨聲明,能力所限,我只能以我狹窄嘅視野去觀察同比較。

    Disclaimer: 以上純粹個人觀察同感想,如有錯失,請多多包容/指正。(唉,終於帶番個腦寫嘢。)

    回覆刪除
  30. 點會唔影響?你咪一日話我有既定立場既富豪囉! XD

    (btw我今篇又係講樓既。)

    回覆刪除
  31. Hello there! This post couldn't be written any better! Reading this post reminds me of my previous room mate! He always kept chatting about this. I will forward this post to him. Pretty sure he will have a good read. Many thanks for sharing!
    Also visit my site - GFI Norte

    回覆刪除

淡极始知花更艷,愁多焉得玉無痕。

Related Posts with Thumbnails