2010年9月24日 星期五

香港地:公車、奇人、奇事

香港地奇人越來越多,以下兩件發生係公車上的事都是本人哩幾日的親身經歷。

一.東鐵

話說本人排在車門較前位置,加上身手敏捷係羅湖一上東鐵即刻揾到位坐,較好ipod之後抬頭望到一家幾口老、中、幼又拖幾個行李的中港之家(?)好狼狽咁款企係車廂中間,於是即刻起身讓座。個年輕媽媽一開始話:「唔好」,但我已經企咗起身,跟住佢叫個阿媽來坐,并且好有禮貌咁用歪歪哋音的廣東話講:「唔好意思,老人家唔搭得車,啱啱係鄉下出來...」我笑笑話:「唔緊要。」(點解我會講哩句而唔係話'唔使客氣'呢?好迷茫。)

幾乎同一時間,一個60來歲著住件鮮紫色T恤的港伯用好標準的廣東話以中等音量咁對住空氣話:「唔搭得車就唔好落來啦!大陸喱!」我O哂嘴咁望住佢,佢個樣原來好憤怒!即係好似全世界都爭咗佢咁。出人意表的是,成班所謂的'大陸喱'都冇搭佢嘴,默不作聲咁當聽唔到。

二.巴士

非繁忙時間非公眾假期,上咗一架新界巴士,因為怕紫外線,撿咗個靠走廊的位坐,隔離靠窗位係吉嘅。過咗兩個站有幾個人上車,當中有個唔知係肥定係有身孕的婦女抱住個歲幾的BB上車,我環顧下車廂,見得我隔離個位係吉嘅,咪挪過去坐入邊個位,等佢坐低方便啲。點知個婦人將個BB轉手交俾身後個男人,自己就'淨身'坐低,然後哩對男女就用好期望的眼神望住好茫然 的我。我冇表態繼續安坐於巴士座上,個婦人開始用啲好粗俗的說話問候人娘親,訴說世態的'炎涼',佢老公抱BB都冇人讓座雲雲...。嘈咗一輪見我(其他人?)冇反應,佢竟然用碩大無比的屎忽逼埋來夾硬搶咗我半個位,油膩膩、光脫脫的半截大腿緊緊貼住我對4個骨絲襪,然後叫佢老公坐係佢隔離...

我真係老了,竟然冇哂火,乖乖哋起身,等佢哋一家團聚係兩張巴士椅上,個男人竟然用勝利者的口吻同個老婆話:「D,一早死開咪好囉!搞著你...」我一啲都唔嬲,只係登個BB悲哀啫。

人說咩人遇咩事,我越來越相信自己係奇人,如果唔係,因乜解究成日遇上啲奇人、奇事呢?

33 則留言:

  1. 自己坐係度都唔抱B,做得咁出面要逼走你,俾著我,我一定唔讓!

    回覆刪除
  2. 奇人奇技奇表演!

    一個位睇出一個人嘅修養!

    回覆刪除
  3. Coffee n Tea ,俾著以前一定唔讓!但哩個婦人又大汗身度又有陣好強的味,咪算囉!再講如果唔起身真係要斗氣啦!唔值呀!

    the8 ,咁搞法總邊敢做好心呀?

    回覆刪除
  4. 真係好過份!! 你真係好修養,我對呢D人真係忍唔到!

    回覆刪除
  5. 我自问不是奇人, 但一样遇到这种奇事, 虽知道在下一年都没有十天在香港.

    上次回来第一天就在商店跟一个欧巴桑吵架. 她跟她的BB车挡住一条通道, 跟一个挡住另一通道的欧巴桑聊天. 我妈不好意思叫她让开, 就只好側身过, 不小心碰到BB车, 然后被她问候. 在下脾气不好, 立刻扯火.

    回覆刪除
  6. 花花,我都唔係奇人,但係香港遇到嘅奇事耐唔耐都會有。

    你嘅第一情況我遇過。係一班阿嬋對住位外傭恥笑,笑佢為乜咁肥,個外傭應該係唔識呢班人嘅。我自己買嘢嘅時候都遇過啲無端端被人鬧嘅情況,另外有啲就睇你唔起咁。呢啲多數係舖頭仔度發生。

    學似你話齋,老啦,廢事同佢開戰。越大越覺得,有啲人真係唔值我嘅時間。

    回覆刪除
  7. Quality Alchemist,你有冇睇聖安娜月餅男呀?
    http://www.youtube.com/watch?v=Le8ulHIrIZA&feature=player_embedded

    唉...香港地...

    wiwiana ,其實唔關修養事,係哩排特別心平氣和唔想煩啫。

    Desertfox ,最緊要係自己心境,想扯火就要扯啦!屈住總唔舒服啦!

    回覆刪除
  8. Anon ,有時我會諗係咪哩啲人可以靠自身爭敢到嘅野太少,而能力所限只能够向看似更弱小的人開刀呢?

    回覆刪除
  9. 要有禮地說:讓坐與老弱傷殘是應該的

    回覆刪除
  10. 有時我會諗係咪哩啲人可以靠自身爭敢到嘅野太少,而能力所限只能够向看似更弱小的人開刀呢?

    是呀!這可能就是佛洛伊德所講的Replacement。

    回覆刪除
  11. 有容乃大
    容天下難容之事

    四個骨絲襪包圍修長的雙腳
    一副好心場容下寬廣的心境

    回覆刪除
  12. "有時我會諗係咪哩啲人可以靠自身爭敢到嘅野太少,而能力所限只能够向看似更弱小的人開刀呢?"

    花花,妳提到呢樣嘢,我就越嚟越感慨。妳所講嘅,就正正係我覺得香港近年嘅一種趨勢。上至政府,下至商戶小市民,基本大問題唔去面對,細問題就捉住吵個不休。因為可以靠自身爭敢到嘅野太少,而能力所限只能够向看似更弱小的人開刀。"賺到盡"呢種理念同以上嘅嘢有密切嘅關系。嗰對夫婦,就係要賺到盡嘅例子。公司要同股東交代,對夫婦要同自己交代。

    以往香港有過呢種賺到盡嘅時候,大概係80年代經濟起飛初期,舉例例如食自助餐要攞到盡,唔理浪唔浪費食物。我睇到嘅係,而家呢種諗法又再重臨。

    回覆刪除
  13. 前日喺巴士上層, 坐後面既女人霸住個吉既窗口位唔俾其他人坐, 佢用帶有鄉音咁話已經有人, 果然下個站佢對17,8歲既仔女上咗車, 當佢地見到佢地阿媽咁樣霸位, 即刻擰頭就走, 但係佢阿媽大大聲兼吟吟o尋o尋咁叫其中走得魔既家姐返轉頭, 等到全車人都望住哂, 搞到個家姐幾唔好意思.

    回覆刪除
  14. 我上次回香港,都發覺好多壯年男人鍾意爭位坐。好似怕蝕底咁。

    類似第一種情況,我嘅西人女友人都經歷過。都喺無啦啦俾本地人/大陸人恥笑/鬧。佢喺比較肥胖(其實都唔喺,喺比香港女仔肥啲啲嗟)。偏偏我嘅友人喺廣東話國語都識聽識講嘅!即刻鬧番轉頭。

    回覆刪除
  15. 真的為BB難過啊...

    每年暑假回香港都會遇上類似的事情,氣得我爸媽都說幹嘛花錢受氣,每年都說不要回來,可我嬤嬤不許嘛,一定要見見孫子孫女(我和弟弟),唉,好為香港難過/擔心。

    :(

    回覆刪除
  16. 所以, 坐公車要坐上層.

    回覆刪除
  17. 細個時睇電視劇/電影見到呢O的故事, 都會心諗『又會咁誇張O既』... 大個發現, 正如倪匡先生所講, 小說O既誇張劇情, 好多時只係參照一O的現實發生O既人和事而寫. 而更殘酷O既係, 現實好多時係更誇張...

    呢O的人好羞家! 哼!

    回覆刪除
  18. 你呢兩件真係奇事,居然冇命案發生

    我曾經有你差唔多嘅第二件事發生係火車上, 我坐係二人位, 跟住有個女人迫過黎, 跟住再叫佢老公坐佢隔離, 三個人坐兩個位到我落車個站...

    回覆刪除
  19. hana姐姐會唔會少見多怪?

    =[

    回覆刪除
  20. 我覺得前者係好多香港低下層的成見 (即是指無須理會對方是否搵著數,總之就係抗拒內地人來港),但個阿伯好唔俾臉咁講埋出口。

    後者一睇就知係人渣夫婦,通當佢地的下一代都係人渣; 如果下一代唔係人渣的話,有對人渣父母應該會好難受。

    回覆刪除
  21. 只係登個BB悲哀啫。>>>>bb大左, 就會學佢地, 呢d人, 應該鼓勵佢, 等佢有報應

    回覆刪除
  22. 行為已經可恥,說話更是可悲。
    祝福佢哋一家三口!

    回覆刪除
  23. 佛爺 :唉...

    過內人 :有容乃大是真的,但我份人係絕對唔會容難容之事!凡事都睇自己心情/境行事,絕不委曲自己。


    Anon ,以我做生意的經驗來講,賺到盡只會死快啲。

    舞了:唉...哩啲阿媽難為咗做仔女嘅...

    eric,係囉,你話香港究竟發生咩事呢?

    回覆刪除
  24. 婉兒:個BB有咁嘅父母真係慘。

    火鶴 :咁下層有位又唔係好長程車走上去麻煩嘛!

    川 :哩啲人真係越來越多啊!

    l.minor ,你有所不知個女人有2個我咁大頓位啊!

    小詩:好明顯係啦!我少搭公車嘛!我啲朋友話如果我日日搭巴士的話根本唔會有咁嘅情形,因為我已經見怪不怪泠漠到唔會讓座啦!

    回覆刪除
  25. 11:54,東鐵嗰單奇人我指嘅其實係嗰個家庭,點解會有將自己睇得咁低微?我讓個位俾佢,講聲唔該已經好足夠,但佢竟然話唔好意思,總要加上咁多'注解',而嗰個阿伯擺明總撩交嘈,佢哋又好似真係做錯野咁噤聲。

    篤篤篤撐 :報應?咪咁啦!個BB冇得撿父母!

    荒木茂 :又難得佢哋夫妻同心喎!

    回覆刪除
  26. 哗!那个伯伯和夫人很没有教养哦!
    换作是我也会走开,懒得跟这种没品的人计较。替BB感到可怜,希望他们明白身教这回事。

    回覆刪除
  27. 花花:

    鮮紫色T恤的港伯,同個唔知係肥定係有身孕的婦女同佢老公,都有一票架,死未?

    仲有,花花你該是溫柔了,俾著我,佢兩公婆諗都唔敢諗!

    回覆刪除
  28. 娜姐:

    成日遇著奇人奇事, 有我陪你呀!>_<
    俾著我, 讓佢個死人頭.

    回覆刪除
  29. U A HK KNG!!!!!

    你 是 香港 奇女子!

    回覆刪除
  30. 吾關你係奇人事,因為香港地周街好多呢d不知所謂既人,佢夠膽話我吖那,我肯定同佢嘈,我一定要讓俾你坐架?吾讓有罪架?

    回覆刪除

淡极始知花更艷,愁多焉得玉無痕。

Related Posts with Thumbnails