濫用「不公義」by左丁山

2011年03月10日
反對預算案遊行，警方計有六千八百幾人參加，泛民話有萬零人，無論用邊個數字，都唔算人多勢眾，而激烈場面一定有嘅，因為過往由老鬼梁國雄等人主持肢體衝撞儀式，警方預知「有規有矩」，驚都未驚過，但現在由不可預測、冇劇本可依嘅社民連與一群激進八十後打前鋒，警方與示威者都唔知會發生乜嘢事。電視畫面所見，陶君行猛嗌，請示威人士移往遮打花園靜坐，但無人睬佢，可見陶君行根本不能主持大局。李卓人等日間點起火頭，晚上已不見蹤影，留番二三百個年輕人與警方對抗，精仔到極。

今年預算案其實與往年差不多，與歷年預算案根本無大差別，點解今年會有人上街？政客慎防玩火過龍。要知道，港英政府與特區政府從來不是「大有為政府」，戰後至一九九七大部份時間均着重無為而治，政府官員根本不知道如何干預市場，如何做經濟規劃，故此回歸後董特首想做「有為政府」，試圖規劃乜港、物港、迪士尼，以及八萬五，即刻焦頭爛額，啲 AO仲唔見過鬼怕黑？況且回歸後，特別重視諮詢，大事可以議而不決達十年之久（西九、啟德），又或者決後遇上突發事件就拉倒重來（如永樂街重建），啲官員有幾多個十年嚟完成一件大項目呀？

故此批評 2011/12年度預算案無長遠目標，無規劃，正如講阿媽係女人，過往一直如是，而香港繼續增長繁榮，合晒古典經濟學嗰套，只有社會主義分子先至覺得周身唔自在。一啲人大罵預算案不公義，根本係誇大到極。既派錢，又退稅，增發綜援及生果金一個月，撥款俾種種不同社群，項目之多抄都抄唔晒，點樣唔公義呢？係要重建居屋先至有公義？孫柏文與施永青可以有排講，獅子山學會亦有強烈意見，全民保障亦作如是觀。大家辯論，左右思想不同，有排拗，但一啲人不可預設自己嘅主張係公義，對方嘅主張就係不公義，若果因此而引伸到曾俊華必須辭職更加冇邏輯。譬如孫明揚，林超英等英皇校友要佢下台，話佢漠視民意，無誠信，但泛民張文光就努力為孫局長辯護，話佢顧存大局喎；啲甚麼不公義嘅口號係用嚟嗌嘅啫，泛民試吓成功阻止政府派六千元，就會身受千夫所指！