2011年3月10日 星期四

濫用「不公義」by左丁山

2011年03月10日
反對預算案遊行,警方計有六千八百幾人參加,泛民話有萬零人,無論用邊個數字,都唔算人多勢眾,而激烈場面一定有嘅,因為過往由老鬼梁國雄等人主持肢體衝撞儀式,警方預知「有規有矩」,驚都未驚過,但現在由不可預測、冇劇本可依嘅社民連與一群激進八十後打前鋒,警方與示威者都唔知會發生乜嘢事。電視畫面所見,陶君行猛嗌,請示威人士移往遮打花園靜坐,但無人睬佢,可見陶君行根本不能主持大局。李卓人等日間點起火頭,晚上已不見蹤影,留番二三百個年輕人與警方對抗,精仔到極。

今年預算案其實與往年差不多,與歷年預算案根本無大差別,點解今年會有人上街?政客慎防玩火過龍。要知道,港英政府與特區政府從來不是「大有為政府」,戰後至一九九七大部份時間均着重無為而治,政府官員根本不知道如何干預市場,如何做經濟規劃,故此回歸後董特首想做「有為政府」,試圖規劃乜港、物港、迪士尼,以及八萬五,即刻焦頭爛額,啲 AO仲唔見過鬼怕黑?況且回歸後,特別重視諮詢,大事可以議而不決達十年之久(西九、啟德),又或者決後遇上突發事件就拉倒重來(如永樂街重建),啲官員有幾多個十年嚟完成一件大項目呀?

故此批評 2011/12年度預算案無長遠目標,無規劃,正如講阿媽係女人,過往一直如是,而香港繼續增長繁榮,合晒古典經濟學嗰套,只有社會主義分子先至覺得周身唔自在。一啲人大罵預算案不公義,根本係誇大到極。既派錢,又退稅,增發綜援及生果金一個月,撥款俾種種不同社群,項目之多抄都抄唔晒,點樣唔公義呢?係要重建居屋先至有公義?孫柏文與施永青可以有排講,獅子山學會亦有強烈意見,全民保障亦作如是觀。大家辯論,左右思想不同,有排拗,但一啲人不可預設自己嘅主張係公義,對方嘅主張就係不公義,若果因此而引伸到曾俊華必須辭職更加冇邏輯。譬如孫明揚,林超英等英皇校友要佢下台,話佢漠視民意,無誠信,但泛民張文光就努力為孫局長辯護,話佢顧存大局喎;啲甚麼不公義嘅口號係用嚟嗌嘅啫,泛民試吓成功阻止政府派六千元,就會身受千夫所指!

13 則留言:

  1. 中國嘅節氣真係好準,驚螫次後,D牛鬼蛇神果然走晒出嚟!

    回覆刪除
  2. 熟讀中史真係好鬼有用。

    回覆刪除
  3. 並唔係完全唔同意左丁山, 琴晚見個年青人喺fb寫話:"用法理去打道德是政治不正確。隨時被網上道德燃上綱上線。" 都覺得幾啱聽, 但感覺左丁山應該上哂岸架啦, 點解佢寫d嘢仲係咁有偏幫有財大勢既人士之嫌呢, 總覺得佢同市民大眾距離好遠好遠咁.

    回覆刪除
  4. 估唔到蘋果都會有啲咁正嘅文,呵呵!!

    回覆刪除
  5. 左丁山本人係香樹輝嘛, 佢講o既野都係有道理既.

    回覆刪除
  6. 無野既!最好庫房D錢派哂比佢地用,每人派六十萬。兼而由李嚼人做特首,桃花行做財政司。

    回覆刪除
  7. 左丁山一各都對李卓人及民主黨不滿.
    李卓人等日間點起火頭,晚上已不見蹤影,留番二三百個年輕人與警方對抗,精仔到極。>>>>近件2遊行, 一向都有一大班人鐘意在結束後自行起哄, 與大會無關, 除非認為任何遊行都唔應該舉行, 否則冇理由入李卓人數。其次, 起哄的以LSD為主力, 要鬧的, 應該鬧LSD OR人民力量。左丁山冇理由唔知, 如此寫文, 似乎有心。

    其它論點, 就係一向既市場經濟原教旨主義, ARM唔ARM聽, 睇自己立場了。

    回覆刪除
  8. 感覺左丁山應該上哂岸架啦, 點解佢寫d嘢仲係咁有偏幫有財大勢既人士之嫌
    >>佢未上岸KA, 佢住在沙田火炭山上, 有幾有錢丫 ? 最重要係佢依家主要搞公關公司, 在中環搵食。

    回覆刪除
  9. 俾晒佢地用,每人點只60萬咁少呀?600億大拿拿,100隻牛鬼蛇神,每人都分到6億啦!佢地做官的話,我實走人!

    ~喵遊俠

    回覆刪除
  10. 利世民係今日生果個專欄幾有新義:

    《蘋果批》畢業生高明輝在面書上留言:「飯民新朵叫保蝗黨。」高明輝的前友華少看不過眼,加多一句:「太文雅啦!明明係乞兒,你叫佢哋做飯民;明明係剩菜,你叫佢哋做廚餘。」
    實在太精采了,不得不分享。
    講到蝗蟲,大家很容易將怨氣發洩到新移民身上。不過,我想提醒大家,其實土生土長的保蝗黨,才是問題的根源。要是這兒沒有人在鼓吹不勞而獲,以納稅人的血汗錢派街坊,香港又怎會落得如此田地?
    更深層次的一個問題:究竟誰是香港人?
    我在香港出生,不過父母也只不過是 60年代末從大陸來香港。作為移民第二代,我很明白融入香港本土文化的過程可以非常漫長。不過, 60、 70,甚至 80年代初的香港,沒有今天那仇視新移民的情緒。究竟兩個時空差異在哪裏?
    以前的香港,福利就是一種恩惠,一般人都可免則免,就算艱難一點也寧願靠自己。
    至於新移民,香港甚麼都沒有,只有機會,下來,就預了要捱。當年的新移民,不但最有拼搏精神,也是最能代表香港核心價值的一群人。

    不收明年薪俸稅 才最公道
    今天呢?遊手好閒的人,只要整天叫苦連天,政客便挺身而出,有理無理要爭取 100萬樣福利,政客自己,也建立了鐵票碉堡,永遠連任。越多人望天打卦,政客的市場也越大。如是者,香港也由只有機會的地方,變成只有着數的地方。
    寃有頭,債有主。不是所有新移民都是蝗蟲,只要是對香港有貢獻的,我們都應該一視同仁。本來,索性不收明年的薪俸稅,才是最公道的做法,也順便省回一大筆行政費。可是,偏偏就是飯民的保蝗黨反對,結果搞到今天香港憎人富貴嫌人貧。
    香港人,以前沒有想過移民的,如今都要做這個打算。飯民保蝗黨,你們究竟在想甚麼?

    回覆刪除
  11. 左丁山今日喺萍果篇"業主家庭多"又係出現咗好明顯既錯誤, 佢好婉轉咁話如果推出八萬五會得罪香港好多業主家庭 (佢話當中高達五成係供滿樓既), 佢呢個推斷完全有問題, 一, 增加房屋供應唔係一定就係等於每年八萬五既目標; 二, 如果家庭置業係自住既話, 樓價上升都只不過係紙上富貴, 一日唔賣掉間屋都唔好以兌現, 但係就要因應樓價上升而每季納多好多差餉同補地價.

    其實增加房屋供應對自住家庭影響最深既可能只係喺呢兩三年間樓價標升之後做樓按既置業人士, 又或者計劃賣樓套現的其他需要人士, 如移民外國. 其餘的全都是炒家和搞地產或相關行業既人. 以左丁山既深厚資歷佢寫出一篇咁偏面既時評文章真係接受唔到囉.

    回覆刪除
  12. 哎, 這篇文不斷有人話好
    真淒涼

    如果知道香某人開設公關公司
    接甚麼生意,
    就知道點解他會一直這麼寫
    香港有一種高級五毛
    是在敵對派系寫稿的(在文匯寫他就不值錢了)
    這種人的價值是因為他的網絡
    可惜沒有氣節, 其實專欄行內都知,
    是"賣"的 (只不過不是明碼實價)

    回覆刪除

淡极始知花更艷,愁多焉得玉無痕。

Related Posts with Thumbnails