2010年4月26日 星期一

下半身的幸福

好戲在後頭
2010年04月26日
世界上沒有哪一個民族,像日本人如此熱衷為屁股謀求福利吧?他們的公廁不但多和乾淨,設備之周到更令人受寵若驚,那些陪太太或女友行公司悶到抽筋的男士,不妨開小差躲在方便之所歇歇腳,順便享受優惠臀部的無料服務,說不定還因此參出另類肉體禪,開拓新的性慾領域哩。脫掉褲子一坐下,馬上感覺到體貼的關愛,暖烘烘的廁板像圍在機場閘口等候偶像的粉絲群,受捧的一被恭維,必定落力演出以作報答。我們有一句「熱面孔貼上冷屁股」,慣性由前者角度出發,只能得出自討沒趣的結論;主角換作後者,效果就完全不同了,有塊殷勤的熱面孔等着自己隨時貼上去,你說能不賓至如歸嗎?

好戲還名副其實在後頭。如廁後射水清洗提供的感動,抱觀望態度的冇膽鬼是想像不出的,非經過親身體驗,不會明白生活在只擦屁股不洗屁股的國度,其實個人權益被剝削得多麼厲害。一樣米養百樣人,一樣水源可沖不了百樣屎忽,每個用家的身體構造都有分別,所以洗淨位置可以任意調校。水勢大小自然也能控制,不過請不要一去就去到最猛烈,那種快感是返唔到轉頭的,做愛你也不想一上床就高潮呀,逐漸遞進才襟玩。我見過最講究的還包括「乾燥」和「脫臭」兩種按鈕,也就是說洗完可以選擇吹風,不怕化學品過敏可以進行噴霧,試問不幸生在日本以外的賤籮柚,幾時遇過此等帝王式招呼?在京都一家連鎖小食店,那隻五臟俱全的麻雀一感應人來了,廁蓋會自動緩緩勃起,我禁不住想:藝伎的知心和溫柔原來並沒有失傳,連廁所都懂得陰聲細氣講 ohayo!


這個 (邁克)講中了我對如廁的全部感受,自從在日本旅居過一段日子之後,如廁的要求再也回不去了,發錢寒買大屋置個功能齊全的靚座厠成了努力掙錢的動力,終於如願以償,從此擁有無需男人的下半身幸福,享受人生關起門來由下而上,爽啊!

24 則留言:

  1. OMG, this is my dream toilet!!!
    Now you are making me so jealous!

    回覆刪除
  2. 你後生過我好多吖,以你咁勤力/慳家/努力的個性相信好快可以如願以償。唔換大屋淨係裝修個廁所都得!一定要駁好哂啲泠暖水喉!

    回覆刪除
  3. 幾多錢呀? size 幾大? 一般廁所裝唔裝得落? 會唔會較耗水呢..

    回覆刪除
  4. 什麼感受jek...形容下吧。我無法想像濕漉漉的感覺

    (你給的Link不是會員看不到的啊)

    回覆刪除
  5. 几年前同埋雨林式花洒、濕蒸房嗰啲浴室用品一齊買嘅(多啲野一齊買容易講價送貨成品又平啲有故障搵負責單位又划一...),好似係二萬几三萬到,依加應該會平三、四成。

    同一般座廁一樣大,應該装得落但要駁水喉所以要扑哂成個廁所鋪喉。如果座廁去水喉附近有水喉就可以直接成座座廁換咗去,最多有小小明喉冇咁好睇遮。

    又唔會好耗水喎!洗下pat pat遮...

    回覆刪除
  6. csyee ,我也不是會員怎麼能看到?可能海外的一定要入會才能看吧!干脆全文copy上來好了。

    我的這個有乾燥功能不會濕漉漉的。

    回覆刪除
  7. 我早幾年裝修之時想過按這個,但最後担心水溫做不到日本那種行溫效果(我家用石油氣熱水爐),結果冇裝到!
    btw, 你用咩牌子?我只識 Toto。

    回覆刪除
  8. 第一次知e樣野來自蠟筆小新。

    回覆刪除
  9. SKII ,我個係原裝Roca,Toto近幾年有8成產品都係大陸做嘅。我家都係用石油氣熱水爐,水溫有3種唔同程度,控制得非常好。

    老人 :蠟筆小新?!

    回覆刪除
  10. 花花:

    我有一個好尷尬的問題,唔敢問。但唔問,又整日也悶悶不樂!

    即係咁,個馬桶噴水清理屁股,水力一定好猛。你知架喇,男人下邊有個袋袋架嘛,咁,比果啲咁強嘅水柱打中,豈不是眼淚水都飈埋出黎?

    或者,這種馬桶,只可以比女人用。咁萬一男人坐落去,按錯噴水掣,豈不是立即暈低。

    請原諒我的問題唐突!你經常都講,男人係用下體思考架嘛!

    回覆刪除
  11. 1)男人辦小事係唔使清洗嘅

    2)有兩支唔同長短、位置的噴嘴,方便女人因應大、小事來用。

    3)每支噴嘴有4個級別任君選擇。

    回覆刪除
  12. 第一次用時,掙扎左好耐...

    回覆刪除
  13. 哇哈哈hana 我岩岩去完日本, 幾乎抬一個番嚟. 我只可以講, 係會用上癮囉.

    如果唔係驚短期內會搬屋, 我裝硬. 慳第樣都唔慳佢.

    回覆刪除
  14. 日本仔真係好識享受吖!

    回覆刪除
  15. 呢一段係我笑唔停嘅一段。

    其實我好後悔。因為當年我都想過整,但又有「有怕痕有怕痛」的掙扎。

    由於裝修時無做喉,而家都唔會裝。

    不過,你講到好似女先覺得好「舒服」咁,唔知男人用又有無咁咩呢?

    回覆刪除
  16. 邁克係男人呀!

    我估男人用女用嗰支噴嘴set温柔程式个pat再就一就位都會好'爽'囉!

    回覆刪除
  17. 比起其他男人,邁克可能對於後庭有更為特別嘅感受。。。

    不過我都用過!哈哈。對於袋袋喺冇問題嘅。暖廁板真喺好有用。其他沖洗功能就OK啦。

    回覆刪除
  18. 廿年前喺日本已經用過呢樣嘢,男人... 應該唔會「上癮」掛。好以"有D"女人會鍾意騎馬咁,男人相對冇咁鍾意騎馬囉 ;)

    回覆刪除
  19. 花花,表哥勁恨呢個廁所可惜我哋短時間內唔會裝修呀!

    咁爽,我都想試!(又怕一試上癮!)

    回覆刪除
  20. eric ,基男真係好文筆,右手邊有條link台北歡歌(二) 基男寫艷遇幾到肉吖!

    逆 :男人鍾意被騎囉 ;)


    the8 ,嗰種洁淨的感覺真係會上癮!

    回覆刪除
  21. 我想話用過好快就會上隱架喇... 1. 用慣後會覺得用手同廁紙抿完後廁紙上有屎是極度不衛生 2. 個種被射既快感無可代替.....

    又,我覺得呢方面韓國仲普及過日本。我去過好多韓國既酒店都己經裝左呢類廁所,反而日本少啲。... 我覺得係咁啦。

    回覆刪除
  22. >用過好快就會上隱架喇

    係吖!有時啲野唔試/冇得試反而好啲,唔使心思思嘛!

    回覆刪除
  23. 嘩! 講到超幸福呀, 我未去過日本, 未玩過. 有機會去日本一定要玩O下!

    回覆刪除

淡极始知花更艷,愁多焉得玉無痕。

Related Posts with Thumbnails