2008年6月12日 星期四

幫人教女

今日成早樓樓無啦啦幫人教女。

早上泊駕車係街邊7-11門口,走入去買報紙(買生菓囉,屋企冇訂,鬼叫方向報總夸張過生菓,生菓除咗有嘉雯、渣兄,總有風月版嘛!),行出來果陣,因為要塞返個銀包入手袋,所以慢咗少少,點知有個13、4歲校服少女從後面一野撞埋來,夾硬奪路,總要大大聲鬧:"八婆行快啲啦!阻X住!"今日我着咗條黑色背心裙,及膝果種,一對三寸半高踭鞋(除咗運動鞋,着平底鞋我會唔識點行路,),個少女矮我半個頭,唔使一秒,我一手揪住佢後衣領,的佢出門口。佢掙扎咗幾下,放棄咗問我:乜事先?
我:我睇你都唔係好壞啫,只不過係青春期情緒有啲波動,燥咗少少,所以我唔會怪你。
少女:靚女,咁人哋趕返學嘛!(我松咗手)
我:你知唔知哩個世界唔係人人都了解青春期哩樣野架?而且朝早出門有邊個唔趕架?如果撞正個同樣燥嘅人,你估你有冇咁好彩啦?唔打都吵一陣啦!我駕車泊係街我總趕過你啦,一張牛肉幹就唔見320了。來,我順路兜埋你。
少女:sorry囉,靚女,唔該哂。
我:靚女,咪好聽囉!如果唔係我哩個八婆有個同你差唔多大嘅女,我費時話你添啦。
少女:咪講笑啦,你邊似啊!、、、、、、如果我阿媽好似你咁開明就好啦、、、、、、

32 則留言:

  1. 若你都叫"八婆", 全香港的女人應該都死鬼曬...

    ~怪人道格

    回覆刪除
  2. 我可唔可以book定第時揾你教吓米b女呢吓請問:P

    回覆刪除
  3. >我一手揪住佢後衣領,的佢出門口。

    十字追魂鎖?

    回覆刪除
  4. 哈哈~~你真係個可愛女人!

    回覆刪除
  5. 小朋友咁就上咗陌生人嘅車呀?

    可能要教埋佢靚女都可能係奸嗰喎! ^^

    回覆刪除
  6. 依家啲細路眼裏只有自己,真係好鬼難教。我常諗,要到呢班友仔大個,出黎社會挨過苦先至識生性。證明過份受保護的孩童生活,過份遷就的學校教育,本就失敗!

    回覆刪除
  7. 我朝朝返工都聽到同一個13,4 歲校服少男,句句說話都要加起碼4,5 個助語詞。我都好想有HANA 你咁勇,除左一手揪起佢衣領,仲可以搵本書掌佢咀!

    回覆刪除
  8. Hana姐,
    初次到臨,客隨主便。

    一手揪住佢後衣領,的佢出門口...用得出依招,應該都有唔少日子既功力,佩服佩服...

    回覆刪除
  9. HANA - you always have my applauses, kisses & hugs:)

    回覆刪除
  10. >>一手揪住佢後衣領,的佢出門口...用得出依招,應該都有唔少日子既功力,佩服佩服...

    係呀,我都佩服呀!

    我仲推斷兩舊bye bye肌肉應該有番咁上下...(喂!邊個打我面!)

    回覆刪除
  11. 我諗人人樂見如此可愛的"八婆" ^_^

    回覆刪除
  12. 竟然,,,,,,,,???
    點解你可以咁夠ginger呢?
    我教書的都做唔到!!!
    佩服死!!!!

    回覆刪除
  13. 咁 cute 既, 鏗鏘集...?

    妳應該一手揸條靚妹衫領...




    H: 點解咁多人死唔見你死既?

    妹:大家咁話!

    H:著左 Dr. Martin 行得快啲呀?

    妹:No !我條仔等緊我,趕時間!

    H :D L L M !早講丫,阿妹,條仔呢?

    妹:呢,出邊果件 5呎唔夠果個囉。

    H :嘩妳無嘢下話?咁都啱???

    妹:阿靚女!而家個市淡呀!頂住先啦。

    H:...Well ~ OK OK,唔阻妳,得,明白明白既,妳話事妳話事..

    妹 ( 嘀咕~): 大佬我咁既樣...係咁上下啦....

    回覆刪除
  14. 嘩哈哈!hana你有冇請佢食埋早餐先?

    回覆刪除
  15. 哈哈果然夠辣!

    生果報、方向報我個人都係認為少睇為妙。

    回覆刪除
  16. 實在太有型啦! 直情好似漫畫橋段入面o的熱血教師呀~

    呢種『以德報怨(雖然~ 唔係咩大事)』o既精神、處變不驚(o的細路行得咁快, 你又放緊銀包)o既反應、冷靜o既對答加o埋天使般o既面容, 簡直係現代版o既木蘭花 (well, 誇o左少少, okay 啦~)

    回覆刪除
  17. 來,我順路兜埋你。

    * 0 *"

    男粉絲

    回覆刪除
  18. 怪人道格:有命活到婆的年歲也不錯丫,你睇汶川啲中學生...


    米兄:咁係得啦!不過可唔可以俾定兩擔米做按金先?依加啲米貴丫嘛!


    Sandra,多謝!有時我真係幾可愛架!


    樸老:教佢記低車牌都好喎。

    校長:下一代靠哂你哋啦!

    Rosie Yip ,我唔係勇丫,係諗起自己個女忍唔住啫。

    回覆刪除
  19. ak兄:大駕光臨,簡直係蓬蓽生輝。
    鶴仔,來,同我去打罐上好女兒紅返來,等我同ak兄暢飲一番。

    a a,抱抱

    易亦、ak、c.m,
    的佢出門口=個少女後面衣領俾我揪緊令到前面的圓領啱啱cool(忘字)住咽喉,另一手輕輕推佢出門口,因為我高過佢半個頭又企係佢身後,佢兩手拂拂掙扎,我就揪緊佢衣領。

    阿哥仔,依加懶,用少啲字係咪唔得先?!(八婆上身中)

    回覆刪除
  20. 馬沙:如果個個為人父母嘅盡哂本份,都唔需要八婆啦!


    mona ,我以前係台灣教過中學架!

    eric,多謝

    大文:陳大文又唔食藥!快啲乖乖地食哂啲藥,姐姐俾你睇鏗鏘集!

    回覆刪除
  21. 大口仔 :佢係去7-11買早餐(三文治)架嘛!


    余若虛:我睇財經、副刊和托比遮。

    川:>天使般o既面容
    真係好誇喎,我唔執下出來包保地唔震人震(老老實實,就算大明星唔執行出來一樣嚇死人)。


    蘇記:花姐好快謝。


    男粉絲:世界丫,唔該!

    回覆刪除
  22. EvilaqiEr,靚女你去咗邊丫?咁耐唔見?改埋扑名添丫?

    回覆刪除
  23. 我想講,
    妳好好彩ar,
    e+即使唔係好壞既o靚妹
    都隨時可能打Q你,
    仲CALL埋仔
    當然, 見你有部車, 佢可能攞條KEY或者COINS....

    我見過, 阿SIR 都小
    仲要係唔係好壞果隻.....

    小心AR~~~~

    回覆刪除
  24. 我以前係台灣教過中學架!

    失敬失敬!!叫聲前輩先得~師姐~~

    回覆刪除
  25. 卡臣:你個乞衣look夠煞食啦!

    mona,hehe,話明中女嘛!

    篤篤篤撐 :多謝提點!我都有啲分寸嘅,果度轉彎就係差館丫嘛!

    回覆刪除
  26. 唉!
    真是一匹布这么长。
    之前因为忙着工作和上课,
    后来却被人网络封锁,导致不能上网。
    最近才重获自由,
    已迫不急待的来看你。

    回覆刪除
  27. 无论《雷草》或《天堂。地狱。》都是我,
    只是我觉得《天堂。地狱。》这个名让人太沉重。
    我不想来看的人也感觉到这种心情!

    回覆刪除
  28. 真人版GTO!!!! 冇得頂,型爆!

    缺乏關心係呢一代人的大問題,但係大陸更大鑊。

    回覆刪除

淡极始知花更艷,愁多焉得玉無痕。

Related Posts with Thumbnails