投機、投資雜談(一)

個巿上到萬九點樓上，雖然持有的股票市值不斷上升，但暫時總未打算減持，依加個市完全冇辦法用數据理性地去分析，只有憑著感覺走。

【中移動、匯豐和港交所】
持有的中移動(941)、匯豐(5)、港交所(388)是三大榴槤股，即係中意的就好中意，唔中意的就极之唔中意。對941的信心冇另外兩隻咁大，但又唔睇得太淡，始終係電訊業的龍頭股，就算個市掉头大跌，哩啲龍頭股始終跌极都有個谱，因為只持有极少量所以唔會沽住，但又唔會再入。

5仔28蚊供股上到60蚊時曾經心思思想賺咗走先，後尾不了了之，上咗65蚊之後反而唔再諗止賺，心定咗落來，再上上落落已經冇感覺，由佢擺係度，暫時睇80 蚊，如果大市冇大改變係55附近會增持。

388係我其中一隻幾年來都保持月供的股票，好多人都唔睇好哩隻股，話阿爺撑上海做金融中心，港交所勢必被邊緣化388前景堪虞。對此我係极之唔認同的，388做的始終係獨市生意，而且歷史悠久(相對於上交所、深交所來講)，市場相當成熟經驗豐富。退一步來講就算真係俾上交所爬頭，生意咪一樣照做，就好似澳門啲賭場咁，冇話一間大哂嘅玩哂！股市就係拍波起起落落的過程，有落就必定有起，而大市的成交量也會隨住牛市上升，388的股价一定會隨指數上升。另外長遠來講總有和深交所、上交所合併的契機，所以長揸係冇錯嘅。

【適量投機194、82】
上個月係＄5.10買入市場先生分析過的194廖創興企業 ，暫時有10％的升幅，但哩隻股係投機得來帶有投資成份的，所以會中、長線持有至少有兩、三蚊執先會走，越來越发覺密密食雞糊再多都唔夠來一鋪清一色和味。有時就算撿股啱但冇耐心、冇大志、短视、唔等得都係冇用。

前几日和Amy、Amy的教授男友C飯聚，其間和投資有道的C相談甚歡，講股票滔滔不絕宏辯一番，各抒其見不傷和氣之餘又各有得著。第一视頻(82)是教授C投資組合中最重磅的，由3、4亳起收集，睇2、3蚊，依加已經賺幾個開了，一股都未沽過，堅持2蚊先開始沽，講真少啲定力都keep唔到咁耐。

我對毫子股真係冇乜投資意欲，但投機的話小注玩下無妨，82舊年業績真係不敢恭維，但哩啲股都係炒消息炒前景格遮。

「第一視頻通信傳媒在三大方面擁有優勢，包括擁有從事網上廣播及發佈的全部牌照、成功建立的品牌及充裕的營運資金。憑藉所擁有之全部牌照，第一視頻通信傳媒得以拓展業務，涉足新聞內容、購物及遊戲發佈等業務領域，此舉將提高第一視頻入門網站及第一視頻直播平台的瀏覽次數；此外還可擴大網上廣告業務，為第一視頻通信傳媒帶來更豐厚收益。」

講真哩啲吹水美顏展望全部唔係我會投錢落去的原因，一個'賭'字先至係吸引我的主力。目前大陸比較普遍的公開博彩只得2蚊一注的體育彩票，但82已經攞正牌係黑龍江開设類似的彩票，有望逐步係全國范圍開設，中國人有好强的賭博基因，買哩隻股都係賭博。

係＄1.08買咗10萬股，未設价止賺/跌位，一切都憑感覺話事，有時感覺遠遠比規距/則有效，炒股票特別是投機性質的，就好似打仗，冇規則是唯一的規則，因為每一場仗/每一隻股票都唔同。


小心小心：純粹個人發呃瘋，千其咪跟(係吖係吖，惊你搭沉船呀！)