投機、投資雜談(二)

【財經新聞和股評】
和為人处世一樣要明白兼聽則明，偏信則暗的道理，報紙不能只看一份，電台/視不能只聽/看一個，網上更要覽眾而留小。至於一众財演的股評有時間一看無妨，但千萬不能盡信，如果唔係好易成為大口爸爸係輸完又黎賭過 中講的最可悲(惡)的大輸家的點心。始終錢係自己格嘛！點可以聽人講两講就攞自己養老/血汗錢去鉸飛？！

其实凡人再叻都係凡人，點可能一世英明永不出錯呢？那啲財演日日要搵罧巴講股，錯一半(已經好勁了)都好合理，但錯咗唔認又或者左兜右兜就唔應該囉！因為佢哋係收錢寫稿/講股，又因為佢受薪而令到一眾聽信專业高手投資意見的散戶損手。當然投資风险係自負的，輸咗錢唔應該怨人，但你點錯路認个錯啲人条氣咪會順啲囉！鏟哂些舊文就當冇事發生？真係好幼稚。

我幾中意睇黃国英啲股評，一來唔會好似陸叔咁唔係模稜兩可冇罧巴，就係推啲龍頭股大藍籌，二來識得認錯得來總要係夠快够直接。

【孖展】
我份人天生冇乜賭性，去拉斯維加斯和澳門入賭場都係斋行斋睇，連10蚊老虎機都唔會拉，所以炒股10年除咗抽新股从來都唔會掂衍生工具、借孖展。借孖展抽的新股總要係具备市況熱、龙頭股、行业好等等利好股价因素的，所以今次奮身入B組抽金隅(2009)對上果次應該係工行(1398)。

【基金和股票組合】
依加除咗指數基金，其他基金一律唔買。指數基金只收1％手續費，其他基金明的手續費由3％～6％，暗的總有各種行政費用同埋外幣兌換差价(有好多基金用美金和歐元為單位)，未見官先打三十大板，太冇癮了。

當我手持指數基金時就會將个股票組合的股份數目減持至10隻以下，如果冇指數基金在手，基於金牛座對安全感的強烈需要會擴大持股范圍，务求做到穩中求胜，不求急富，但願不窮；唔輸間厂，總贏盒糖。

目前并無持有任何指數基金，所以連埋月供的股票共持有十幾廿隻股票
(多咗啲)，如果個市調整得幅度夠大會考慮買恆生標普500指數基金、2800、2823，所以依加諗緊減持相關股票。