2012年2月15日 星期三

慶祝啲咩呀?

每年一到昨日實有好多人問:「點呀?今日點慶祝呀?」無論有冇情人都好,我都會好奇怪,慶祝啲咩呀?慶祝有情人?喂,有的話日日都有架啦!日日都可以好'慶'嘅喎!冇的話,自'慶'來把鬼啊?!

真心覺得二月十四同七月十四係冇分別嘅,去街嗰陣一樣咁得人驚。滿街女仔攞住一束或殘或嫩、或靚或俗、或大或細的鮮花,小心翼翼咁護住束花逼巴士或地鐵,搞到披頭散髮不特止,仲要擺出副女王幸福冧樣,撞鬼囉!難頂同令人驚嚇程度同樣爆燈。有啲仲會同隔離個(肉)赤樣男人一齊係xx迴轉壽司店、xx咖喱連鎖店門口依偎住排隊等位,當然束花先至係主角,因為佢倆個都會力保束花唔冧,費時個女仔夜晚返去冇得搵個玻璃杯插花吖嘛!

啲花束幾唔環保呀!無論多少枝都會用好多花紙同裝飾,其實鮮花就咁一束扎埋一齊,就算係幾枝菊花都靚啦!使鬼搞咁多野,真係唔明啲人成日聲討地產霸權,,到佢有能力可以拒絕消費覇權時又會咁順攤畀多咁多錢去支持嘅?

講咁多係咪酸葡萄心作崇呀?係啲唔係啲囉!係就係真係冇人送一束束鮮花畀我,事關一送我實打爆佢個頭,唔係嘅就係我真係一啲都唔稀罕囉!望住我啲盆栽花,係自己精心照料下開完又開,嗰種滿足感又企是盼望二月十四收束鮮花的妹妹仔所能理解的。

 個天對我真係不薄,知我唔鐘意睇,所以令我隻右眼發炎又紅又腫,矇住塊紗布係屋企休養,呢鑊真係冇眼睇囉! 神奇的地方在於瞓咗成日,夜茫茫飽醒後,拆開塊紗布睇下,咿,竟然好得七七八八了喎!

(我一直都唔鐘意用粵語口語寫文,畀教獸講一講之後覺得有時用口語表達其實幾啜核,寫博話嗮係自娛,也就不講究正文了,還望看倌通融。)

31 則留言:

  1. 呵呵呵,口語入文,我 like 呀,我時時都係咁!

    花花好快好番,痊癒快過火箭!

    回覆刪除
  2. 眼呢家野要小心d,早幾年我視網膜脫落,好彩即刻去做手術,如果唔係分分鐘已經係獨眼龍!

    祝早日康復!

    話時話好耐無見你了,揾日出黎食飯? 但我已轉左工,依家在鰂魚涌返工...

    回覆刪除
    回覆
    1. 咿,鯉耀龍門?恭喜喎!

      好呀,揾日食飯。

      刪除
    2. 睇咗醫生架啦!話眼腺發炎,食咗消炎藥,加下經已好番了。

      刪除
  3. 寫Blog同過節一樣,唔係做俾人睇嘛,最緊要唔好好似D收花女咁,連自己都玩埋都不自知。

    BTW,take care^^

    回覆刪除
    回覆
    1. 查實我冇乜過節觀念,事實上我係幾討厭過節,乜乜紀念日嗰啲都唔多鐘意。對我來講要開心要快樂要慶祝幾時都得,好隨心所欲。

      刪除
  4. 情人節過左呀,所以你都要快d好番!

    自由

    回覆刪除
  5. 唔怪得好似同平時有啲唔同, 原來玩口語! 又幾搞鬼~

    回覆刪除
    回覆
    1. 靚仔呢排有啲咩搞作呀?

      刪除
    2. 忙到發癲, 有時間都訓吓, 自閉生活中 T-T

      你好番就咪成日玩啲花花, 陪吓啲港男玩啦~

      刪除
  6. 话时话,我这辈子试过两次在情人节送花给女朋友,两次都在当年分手。Never again, never again.

    回覆刪除
  7. 娜姐姐, 好耐無見~!

    我同意你呀! 至討厭人地祝我「情人節快樂」, 有咩咁值得快樂? :p

    回覆刪除
    回覆
    1. 你咁後生都咁諗?小心畀人話成熟呀!

      刪除
  8. 好好看! 我都鍾意盆栽多D,如果有個男人送我一盆花我會比較開心!

    回覆刪除
    回覆
    1. 嗯,我成日都收好多盆栽平靚正。

      刪除
  9. 哈~有時隻眼開隻眼閉, 會令自己好過些。

    回覆刪除
    回覆
    1. 單眼?好易令人誤會嘅喎!嘻嘻。

      刪除
  10. 哈哈,你講晒我的心事呀!

    回覆刪除
  11. 證明我們老了。哈哈!

    回覆刪除
  12. 年輕時我就正正係咁樣諗,乜乜節、乜乜日,慶乜鬼!買花收花?食情人節餐?咪等同做水魚囉!

    年紀大咗反而覺得慶祝所謂節/日其實都幾好。原因就係日常生活已經平淡如水。平淡當然有平淡嘅幸福同快樂,不過如果能夠係某一啲日子裡做一啲唔routine嘅嘢,都未嘗唔係一種少少嘅正面刺激。當然,唔routine嘅嘢唔係節日做都得,不過有時人懶咗,節日嘅來臨係一個鬧鐘。

    回覆刪除
    回覆
    1. 嗯,有道理,節日係留畀循規蹈矩的人慶祝的。因為我呢啲唔按常理出牌的人是少數,所以商家先至可以利用節日大贊特贊。

      其實我呢啲唔注重節日的人幾適合當小三嘅,可惜年紀大縱有潛質已冇特質冇機會囉!哈哈哈灬

      刪除
    2. 當小三(或小四小五小六)其實幾好。一無老大要生要養要做嘅壓力,二無襯家既無謂又難做嘅麻煩,三有時有候會有人陪(過時過節無都無所謂因為有自由出去玩都無人知),四若然功夫到家分分鐘攞錢多過主人婆(四太有眼你睇)。勿論道德高地,只論實際著眼點,男女均可。

      唔按常理出牌其實幾爽,只不過當身邊嘅人都要按常理出牌時(例如返工返學時間就唔到,要暑假節日先去得旅行做水魚),有啲妥協可能係必要。

      刪除
  13. 我從來也未買過花,去探病也買生果,因為花唔食得既!嘻嘻!

    小心隻眼,有朋友視網膜脫落,手尾好長。保重!

    回覆刪除
    回覆
    1. 我後生嗰陳畀人係心口捅咗一刀,爭啲冇命,當時有好鬼多追求者爭先孔後送落地花籃到醫院,我張病床圍滿住啲花籃好似開追悼會咁,足足開咗一個月。

      有心,經已完全好番,醫生話今日化得妝了。

      刪除
  14. 行過多嘴~
    梗係送一盆盆花好o的,起碼完完整整,有生氣~
    而家個個都就咁拎住個o的貴一貴o既植物性器官去show off同求愛,唉~

    隻眼可大可少,抖耐o的好o的~~~

    回覆刪除
  15. 你喜歡妳的文章、谢谢!其實扎花系魚餌泥啫

    回覆刪除

淡极始知花更艷,愁多焉得玉無痕。

Related Posts with Thumbnails