拙

上星期四，東航(670)一復牌就沖進去，小注賭一鋪，結果當然得個桔，攤咗係度。今早睇下覺得唔會再有景諗住平手執啲啲走人，市場即造價＄1.o9沽咗。唔夠一分鐘電話信息到，揭開我本買賣股票數薄，寫埋個沽出價，瞟一眼隔離位嘅買入價，即刻笑唔停口，原來我一直認住買入價係＄1.00，所以先至會係＄1.09當贏執啲出貨，點知原來擺烏龍，買入價原來係＄1.10，跟手總要改返啲字嘅顏色。(買入我會用藍色，賺就係隔離用紅色寫低，蝕就用黑色，方便記數一目了然。)

可能因為係有限錢，所以唔單止冇嬲總笑到收唔到聲，講俾損友聽，一樣笑爆嘴，所謂物以類聚大概就係哩個意思了。

交通银行做緊買入股票免佣、免存倉費優惠，至哩個月底，可以減輕短炒成品，有儲蓄戶口嘅不妨開埋証卷戶口不另收費。

$$$$$$$$$$$$$$$$$$$$$$$$$$$$$$$


今日麥記係多份報紙頭版派優惠券，套餐減五蚊，俾佢洗咗腦，又因為真係好耐冇幫襯佢了，下午走去買咗個餐，記得叫人汽水走冰、雙層芝士孖寶全走，竟然唔記得俾剪得整整齊齊的優惠券，俾埋錢係排第二次隊等攞果時先醒起，又係笑餐飽。

笑還笑都總記得攞埋我張麥樂樂卡出來要求後補贈品(哩個月買套餐送細薯條)。攞咗餐，將跟餐送嘅中薯條送俾隔離兩個學生哥，學生A問B："乜miss唔係話天上唔會有餅跌落來咩？"我搶答："所以請你哋食嘅係薯條唔係餅囉！"乖巧嘅學生B即刻話："多謝miss！" 哩個後生仔口甜舌滑唔怕丑，濃眉大眼、準頭有肉，有前途。

明明唔見咗兩次錢，但兩次都令我笑不攏口喎！唔通係金融海嘯後遺症？