《葆心直言－陳葆心》馬時亨的奇幻旅程

我年青時曾經好想做作家，後來想深一層，覺得雖然係「作」，但點都要有啲生活體驗先至似樣，否則好難寫出一篇好嘅文章。正因為有此想法，所以當時樣樣都想試吓，見識吓。　　

我曾經好想知道舞廳係點，小姐係點樣叫法。由於是大家閏秀，點癲都無可能自己走入去舞廳，最後就跟埋哥哥去見識。當時的舞廳，分高、中、低三個檔次，高級舞廳如杜老誌，舞小姐每小時收費８﹒８元，中級廳如金鳳池就收６﹒６元，低級廳收４﹒４元，尾數的８毫、６毫同４毫子係稅。　　　　　　　　　　　　　　　　

＊後悔為官？此言差矣！＊　　

舞廳裏的小姐，話就話每個鐘收費，但紅牌一般只坐１０至１５分鐘，之後無論有無客，佢都話要過枱。就算坐冷板櫈嘅，最多也只坐半個鐘。小姐好識揾錢，如果一個客人要追佢，就一定要買鐘，一買就幾十個，甚至是上百個，所以舞廳同夜總會都一直是「有錢就英雄，無錢就狗雄」嘅銷金窩。　　

我舉咁嘅例子，並唔係教大家去跳舞，而係想話畀大家知，凡事若只是道聽途說，肯定同真實情況好有一大段距離，但若果你親身經歷過，就一定會有體會，內容肯定豐富千百萬倍。　　

近期股壇最大話題當然係柯清輝同馬時亨聯袂做齣好戲。馬時亨曾經話過後悔加入官場，我認為他此言差矣。坦白講，做官肯定令佢大開眼界，一上場就遇上仙股股災，由陪人食飯食到唔得閒睇文件到鞠躬道歉，瞬間天堂瞬間地獄，如不入官場，又何來此歷練。　　

他日馬時亨真正告老歸田，六年的官場生涯，肯定是他人生路上的精彩的回憶！

《中潤證券有限公司主席　陳葆心》