青心直說 [胡孟青] 2009 11 19

散戶中籤率高未必炒唔起

本周新股巡禮，打頭炮係龍湖地產（ 960）同通天酒業（ 389），龍湖嘅大孖沙絕唔少於近期上市嘅內房股，仲有 GIC同淡馬錫呢對星洲姊妹花，加上大鱷大手入飛，睇頭唔細。認購超額咁多倍，奇在散戶中籤率竟然有五成咁高，抽 3手就肯定分到 1手，反而大額畀基金大戶嘅中籤率最多只得 3.5%，認購 5000萬股先分得 175萬股。經過恒盛地產（ 845）嘅慘痛教訓，散戶接咁多貨，往往令人有錯覺以為唔會有好嘢，部份孖展客可能仲會被追收孖展補錢，首日上市好可能即沽補倉，咁就正中機構大戶下懷。不過投資者可以放心，由於龍湖向交易所申請咗豁免公眾持股量最少要有 25%嘅限制，佢只會得 20%貨源喺街遊走，炒供求冇難度。龍湖上市後係少數淨現金嘅發展商，公司話要保持 30億元或以上備用流動資金嚟買地，為咗保留現金，負債率維持喺 40至 80%亦唔算誇，只要做到貨如輪轉，出現資金斷裂的可能性較低，更有助公司維持可持續盈利增長動力，喺保守與進取之間取得平衡。

街貨少易炒供求公司現有 35個發展中項目，約三分一喺發源地重慶，其次喺成都、北京、西安及上海等，土儲超過 1250萬平方米。睇牌面就知佢哋已喺長三角及環渤海地區插旗，他日再炒地區經濟概念，記得諗起佢呢個特性。

既然佢標榜自己係「最不家族的民企」，到底班底係咪多元國際化？據講，佢係國際獵頭公司 Korn/Ferry喺內地嘅頭號大客，上至管理層下至經理級，皆以用人唯才為本。先講坐 Board嘅 CFO林鉅昌，曾經係美林研究部副總裁，擅長寫分析報告，好清楚市場要投資乜嘢上市公司，佢未過檔前曾經係華潤置地（ 1109） CFO。管錢有猛人，管人亦有寶潔做過嘅房晟陶，年紀仲輕得 36歲。老闆吳亞軍係記者出身，佢為人極低調，被喻為三不人物︰不簽名、不上鏡、不做訪問。所以外界對佢認識不多，只知佢做記者期間，同重慶政經部門官員已建立良好關係，亦係佢發展房地產王國的重要基礎。