女廁。投資。人生

舊年火鶴寫 壞習慣‧排隊 ，我貪玩將佢寫麥當勞段文改成女公廁。回應咁寫：

「一個商場女廁有五個廁格，如果要排隊，有兩種方法。第一種係分五行嚟排，每行係特定某一格干淨企理廁格俾你方便。第二種係全部人排一行，邊格空咗就俾下一位方便。全部人排一行，係較為有效率及公正。

譬如有100個人，邊個先到就邊個方便先，邊個廁格空咗就俾下一個人用，就算有一兩個人方便好耐，但對排緊隊嘅人嘅輪候時間都無乜好大嘅影響，因為其餘果三個廁格依然運作緊。但問題係，一入到女廁，睇見要排100個人之後，你可能會嘩一聲，然後講句「搞 Q錯呀」，跟住就認為商場女廁安排失當，要等100個人先輪到你云云… 你嘅怨氣，全部落晒商場。

如果排五行呢？譬如有三行排廿五人、一行排十五人、一行排十人，一樣係一百人。想去廁所嘅你，你會排邊行呢？依照無蝕底又急住去嘅心態，人通常會揀最短，即係十人果行嚟排，因為望落會快啲輪到你。但事實係咪咁，就要睇運氣。

如果十人果行，有條女屙完又屙，屙极都有，胸墊走位整完又整...嘅話，咁你就有可能排得耐過排廿五人果行，甚至一百人排一行。不過呢種方法，要排邊行，係你自己揀嘅，快人一步理想達到嘅話，你可以話你自己醒目或者好彩。但如果你慢人好多嘅話，你就只可以怨自己，半點不由人。

其實世事嘅野冥冥中自有注定，就算唔想怨自己，阿Q啲諗都可以怨下個天嘅。」

**************************************************************


點解搵返段留言來貼？事關最近親眼目睹了在文明社會發生的不文明事件。

廿幾個亙不相識的老、中、青女人，在狹窄污穢的空間打哂蛇餅咁排隊，個個一臉忍樣。一個四十多歲的中年婦人沖咗入來，更加忍樣地大大聲話："唔好意思，我好急吖！俾我去先啊！" 老、中青女人即時同聲回應："入得來公廁排隊嘅有邊個唔急啊？排隊啦！"

雖然我睇得出佢急過我，而我又願意俾佢去先，但係望下排係我前面果七、八位仁姐，我唯有唔出聲，低頭忍。點知唔够三秒，就聽到有人話：啊呀！真係瀨喎！！！"個瀨尿係身嘅女人淺藍色牛仔褲濕哂！不過佢記得用粗口問候排緊隊嘅所有女人。我聽到有人細細聲話："咁大個人自己唔知自己事咩！你瀨好過我瀨。" 哩件事發生係九龍區。

果一刻，我覺得做女人都幾無癮，係公廁排隊去方便是一件總難頂過生仔的女人難事，因為今時今日任你幾富貴幾好生養，就算係李嘉誠個新抱都係生四個啫，但去公廁了喎，係纏繞正常女人一世的問題。

由女廁瀨尿事件聯想到投資和人生，每個人都應該自己知自己事，凡事預鬆啲，總有唔好聽人點，始終人人都是抱住"你瀨好過我瀨"的心態做人嘅，有起事上來，真正幫到你嘅只有你自己。總有就係旁人的安慰或贊賞不是錦上添花就是過眼雲煙，尿係瀨係你身，錢係蝕你嘅。

本人金句中的金句：講多無謂，行動最實際！

(即係……)