誤會。自製正能量

白天和黑夜篇文 一出即刻引來諸多博友回響，其中有讚有彈有惡意功擊，無論讚或彈我發覺博友們可能都誤會咗我貼相出哩篇文的原意。

今晚和一年先見一次的老朋友飯聚，八個人有七個都有買匯豐，一個二個面口都好難睇下，個個呻緊5仔累佢哋唔見咗幾多幾多錢。見我笑笑口咁個個以為我冇揸5仔所以輕鬆自在，話俾佢哋聽我揸住嘅匯豐絕不少過佢哋任何一個，個個都唔信咁嘅表情。到咗點菜果陣時，個個都話要慳啲食平啲，我咪問佢哋囉："匯豐依加90、100你哋係咪會沽先？你哋係咪等住賣匯豐嘅錢開飯先？哩餐飯開心啲食，或者愁眉苦臉咁食都係一餐飯，睇你點撿格遮。如果你對匯豐冇信心認為佢冇前途，咁咪斬立決止蝕囉！如果有信心嘅就唔好再質疑佢。就好似女人撿男人咁，一係信一係唔信，信啲又唔信啲，斬纜又唔舍得，攬住又成日呻下怨下咁，唔變黃面婆至奇。"

匯豐由100樓上跌到依加50幾，有幾多個揸住佢股票的小股民可以笑得出？睇住自己辛辛苦苦搵返來嘅身家係咁縮水有幾多個人真係可以無動於衷？係哩個謠言、道理、分析滿天飛嘅時候邊個都唔好信，只要信自己，然後就需要自製正能量自我催眠。我相信就好似財不入急門的道理一樣，喜不入愁門係另一個道理。

篇文貼相唔係因為我要証明自己個樣比真實年齡後生，係要証明正能量的功效，我又唔係公眾人物，又唔係幫護膚品公司賣廣告，要証明俾啲網上世界的朋友睇我比真實年齡後生，把鬼咩！

另外我總想講，我從來都唔會去連根拔買衫，果啲衫就算三折我都嫌貴。相片中白色果件上衣價值二百蚊新台幣，黑色果件都係百多元港幣而已。所以你話了，匯豐跌成咁如果唔自製正能量，點頂吖我。