2008年9月18日 星期四

我愛youtube

最憎揸住雞毛當令箭的人了,也討厭欺善怕惡的人,在安全情況下據理力爭是我的作風。

車住表姐去幫表姨甥買生日蛋糕,出一個有4個大路口的迴旋處,擰轉頭睇清楚右手邊10駕車身位都冇車先出路口,點知一駕交通警的鐵騎突然沖過來,時速至少8、90公里,我冇讓佢,因為我部車已經出咗迴旋處大半個身位,而戎裝驚察就想由內線出返外線然之後出大路。佢唯有剎車窒咗窒,但好唔憤氣,叫我靠邊停車。

我好興咁問表姐乜我有錯咩?表姐總興過我,話個差佬要玩野就玩大佢,我哋根本冇錯。表姐的駕駛經驗總叻過我,揸咗成廿年私家車,一分都冇被扣過。個差人企係鐵馬邊諗住我會落車行埋去講好話求情,點知我打咗死火燈,坐係車度嘆冷氣唔郁,佢唯有谷住道氣行埋來。我鉸低車窗,佢低下頭好惡咁問我:"你知唔你你頭先咁樣好危險?我唔剎車你會撞親我?車牌!"表姐好大聲咁話:"攞咩車牌吖?我哋又冇錯,係你自己高速咁沖埋來,要攞你攞先!"
我:"唔該警員委任証!"
差:"我成身制服都唔得?"
我:你得唔得要問你老婆至知,關我鬼事!"
表:"依加咩都假,點知套制服真定假遮。"
差:"乘客唔準出聲!(???)
表:"差人大哂吖?有你講冇人講?香港有人權!咇啦叭啦......"
我:"唔該警員編號,我要投訴你。"
差:"你投訴我乜野識?小姐!車牌!你知唔知我可以告你危險駕駛?!"
我:"你唔俾我都唔緊要,抄低你嘅車牌一樣遮,我要去驚察公共關係投訴科投訴你濫用職權。"(俾咗車牌佢)

個差人揸住車裝模做樣call上台,冇幾耐(一、兩分鐘到)佢有個同樣揸鐵馬的同袍到場,哩個時侯我經落咗車,指手划腳話個差佬點樣沖出來,醒目的表姐揸住部手機影住成個過程。我叫佢影清楚啲擺上youtube俾人睇下差人點蝦小市民。果個本來來支援的差人,一聽到話擺條片上網,唔好話幫拖,連行都冇行埋來,粒聲唔出靜坐岸上觀。

差:"你識唔識揸車?出迴旋處一定要讓後邊啲車過哂先行得!"
我:"唔該你睇清楚個牌,我揸咗十幾年車!你突然間高速沖埋來避無可避喎!"
差:"你知唔知你唔剎車讓我,我又唔剎車,會炒車!十幾年又點吖?唔識就係唔識啦!我揸幾年都好過你。"
我:"噢,原來我阻住你,所以你要凶我。警察嘲笑女人揸車唔掂!"(對住鏡頭講)
差:"嗱,我冇話女人吖!唔好亂講!"
我:"噢,驚察話小市民揸十幾年車都係冇唔掂,比唔上警察揸幾年。咁係啦!警察可以超速、可以橫冲直撞,可以嚇阻住佢嘅小市民。"
差:"咩嚇吖?我真係可以告你危險駛!係咪要玩大先?"
表:"玩咪玩囉!惊驚你吖!

哩個時候我趕咗表姐上車,表姐有樣脾性係做人最咒忌嘅,就係唔識得適可而止,做唔到收放自如。

我:"咪玩啦!阿sir,你真係告得我入又點會唔攞埋我身份証吖?!定係你疏忽職守啊?"
差:"我仔細老婆嫩,萬一頭先有啲咩事,佢哋點算呢?係哇?"
我:"淨係得你有屋企人咩,老老實實了,我就唔會向你道歉了,你點睇?"
差:"好了,哩次就俾個口頭警告你,下次小心啲。"

我對電腦、電子產品認知程度勁低,哩部機仔隨手袋住成兩個月,養兵千日用兵一時,今次要用來攝影竟然唔知點操作!求知欲勁高的我立刻走入電器鋪問人,原來簡單到吖!

問完行多個圈,忍唔住買咗新玩具,HP ULV1.6G8.9"VHB銀鋼面勁型仔。信用卡12個月免息分期$4,390,俾信用卡唔分期$4,269,俾EPS再平多$100元,換言之我用$4,169買咗哩部機。(消費權益在你手,據理力爭要開口!)
贈品一,問經理要。


贈品二、三,問主任攞,另外總有一隻adidas的斜揹袋送咗俾表姨甥。

贈品四,售貨員都有權送嘅。

21 則留言:

  1. 同交通差鬥,遲啲我講我嘅故事!

    回覆刪除
  2. Hana 姐是我的網上偶像.

    回覆刪除
  3. 你好叻!!!好勇!!!不畏強權!!!
    官字兩個口,平日如何刁鑽的我,多數收晒皮。哈哈!
    不過,如果太過份,我都誓不低頭的!
    祝路路暢通,出入平安。

    回覆刪除
  4. 我唔識講僨...
    有無得過兩招???

    回覆刪除
  5. 雖然有時我都好唔妥D交警...佢地好多都中意濫用職權,欺壓我地D小市民...
    不過睇完依篇野唔知點解個心硬係唔太舒服...

    交警真係好辛苦架...大熱天時著住甘厚套甲,仲要渣住架CC大到熱到可以煎蛋蛋既鐵馬...所以盡可能我都由得佢地...哎...

    回覆刪除
  6. "最憎揸住雞毛當令箭的人了,也討厭欺善怕惡的人,在安全情況下據理力爭是我的作風。"

    └(^o^)┘

    "在安全情況下" 可圈可點啊!

    回覆刪除
  7. 哎呀, 惠康電腦, 好易壞的

    雖然幾千蚊玩具仔唔算咩野, 但係壞係上來都會激氣的啊.

    買我果隻fijitsu吖嘛!

    回覆刪除
  8. 笑爆嘴!

    (我就覺得查實唔算揸住雞毛既,係個哥哥仔死要面咁遮)

    回覆刪除
  9. 如果俾我見到你部相機(實物),

    我一定會抆鬼晒D貼紙!

    回覆刪除
  10. 我朋友個case又係同你一樣
    結果, 同人唔同命
    條差佬告佢:危險駕駛(唔係不小心駕駛ar)

    原因只得一個: 佢係麻甩佬 !!!!
    靚女, 真係有jestso !!!

    btw, 你部hp,邊度有?
    我都搵緊ar

    回覆刪除
  11. 這篇令我想起: 有個朋友爸爸以前係交通警, 有次佢炒左車, 差d毀容...瞓左醫院成個月!

    娜姐呀, 部hp好用嗎? 我都準備買電腦呢, 唔知買邊個牌子...
    你R到咁多贈品, 真係服左你~!

    回覆刪除
  12. 差:"我成身制服都唔得?"
    我:你得唔得要問你老婆至知,關我鬼事!"

    好爆!

    男粉絲

    回覆刪除
  13. 有個表姊係度撐到行
    你就可以輕輕鬆鬆比返個落台階佢
    咁樣談判想唔嬴都幾難
    當然仲有理由同相機等等係手
    咩都唔駛講喇

    回覆刪除
  14. 校長:幾時講埋女白炸單野吖?

    enigma:我係你fans就真!你睇咁多書,我哩排為口奔馳忙到飛起,都冇乜時間睇書。

    小苗兒 :我從來都冇唔妥交通警,我份人最叻就係對事不對人。交通警真係好辛苦架!

    回覆刪除
  15. abby,也祝你路路暢通,出入平安。記住遇上啲無理取鬧嘅白炸唔使驚佢架!

    Morca ,hehe,你識整符號文總唔夠?

    tt,可惜我唔係男人。哈哈!

    樸老 :係吖!至緊要安全。我成日都同啲學生講:凡事唔好沖動,意氣用事,如果一個唔覺意俾人打咗巴,就算俾你打返十巴佢,你始終已經受咗巴。唔抵架!

    回覆刪除
  16. 魔術師:fijitsu咁係好啦!但貴吖嘛!
    我屋企同公司都用HP全部都冇壞過喎。

    c.m,唔係哥哥仔喎,阿叔來架!

    火鶴:非常報歉咁通知你,你已經冇機會啦!因為已經俾妄抆咗。

    篤篤篤撐 :咪百X滙囉

    回覆刪除
  17. 火女:我另外有部SONY VAIO,如果你冇其他notebook 我就唔建議你買哩部啦!事關個芒實在太細。

    男粉絲:hehe...天時熱吖嘛!

    易亦:查實我啲'盤問'技巧唔差得過啲師爺仔架。^.*

    回覆刪除
  18. 好偑服你, 遇到警察我通常都唔會aer,費事出事, 佢地要"錯"你真係有好多計.
    舊年我試過行錯路在偏僻唔熟識的地方在兩條行車線間猶豫, 剛巧前面有路障, 個差佬"入"我响前面停(佢事後講,但我覺得佢係叫我停响佢旁邊), 但係我停响佢身邊, 跟住佢問我幾年牌, 我照實話7年, 佢叫我攞牌俾佢睇, 睇完就寸我話, 我唔識睇佢手勢, 如果車多d就好易出意外, 佢可以告我阻差辦公同危險駕駛. 我心諗, 車, 呢度想揾架車睇下都好難, 考牌又無話考差佬手勢, 你個姿勢又唔知想點, 又唔見我以前會做錯? 不過我都唔敢講咩, 只係求下情, 有時我覺得有d差佬係想攞下威架渣

    回覆刪除
  19. 歡迎光臨!
    我敢咁同佢撑係因為我識得捉心理同理知道公務員架構jar



    Hana

    回覆刪除

淡极始知花更艷,愁多焉得玉無痕。

Related Posts with Thumbnails