2008年10月8日 星期三

雷曼'苦主'有幾苦?!

渣沽兄寫 守尾門閒談 ,我好叻第一個留言(唔知點解越來越少人留言,係冇野寫定唔敢留呢?),我咁寫:

「變幻原是永恆!
世界一變哩種守尾門方式又唔掂啦!例如通賬負利率,今日的100蚊等如聽日嘅95蚊,如此累推問你點守?!

經歷過幾次戀愛的人都知道,次次失戀都痛苦萬分,且成日都認住愛情水用哂唔會再戀上誰人,但實情係時間一過或時間一到咪又再戀上囉!除非真係走咗去做和尚/尼姑(做幾做都有機會再入世,講唔埋)投資、養老金情況都差唔多係咁上下,所以呢,都係順其自然、見步行步實際啲。

又:我真係唔明點解要用"苦主"哩兩個字了,俾人呃入咗會做傳銷果啲人唔苦咩?貪多一兩厘息都叫貪吖!貪得少就叫苦主貪得多係咪應該叫大苦主?債券就係債券,真係穩陣果啲叫定期吖嘛!舊年又有邊個會話雷曼、AIG唔穩陣呢?!

某啲香港傳媒應該香啦!」

然後今日睇到報紙上的雷曼'苦主',一個又一個咁話賠得返60、70%本金都係唔夠嘅,一定要銀行和政府陪足100%先得。

好多人都講緊、寫緊哩件事,有贊成有唔贊成,有同情又有唔同情嘅,我就唔想再講咩大、小道理,我講我自己。

我年紀唔大,但有十多年投資、投機經驗;我錢唔算多,但去銀行辦事唔使排隊同埋有咖啡或者茶飲。有日,有個好相熟的銀行職員同我講果個月爭少少數埋尾,可唔可以幫佢買十萬、八萬雷曼迷你債券,當時個市牛氣沖天,我都感覺到暴風雨前夕的熱力四散,諗下雷曼債券好穩陣,買個十萬可以幫到人又可以分散風險,都幾好!咪應承咗靚女幫佢買十萬銀,叫佢整定文件等我上開去佢間行先簽。

雖然隔咗幾日我上到去果時,個靚女原來已經離咗職,而果幾日個市又急跌,有平野買,所以最終我係冇買到雷曼迷你債券,但我如果買咗係咪都應該叫政府、銀行賠返哂俾我呢?

我淨係知道如果我買咗,哩排我會好唔得閑,因為要去示威游行吖嘛!而且我一定會係哩度貼埋告示公告網友:雷曼'苦'主游行示威,時間、地點唔該通知聲了喂!


孫楠 - 拯救

14 則留言:

  1. 冇錢有冇錢好,好得閒,唔駛煩。

    拿,咪打...講吓咋!

    回覆刪除
  2. 嘩, 你若上電視, 我地咪好養眼...

    鏡頭前的戾氣都少一些.

    有些買了的人, 真係好慘的...

    但怎賠償, 卻是難以理清.

    話時話, 那隻中青白鴿周圍攞綵, 好乞人憎...

    回覆刪除
  3. 如果你買左, 哩排你唔洗去示威游行, 有o甘多人上街, 係屋企慢慢歎, 有jetso先施施然去攞錢la~~

    btw, 如果你上街, 記得通知聲, 電視台一定影你, 等我預9定錄影機先la

    回覆刪除
  4. 見enigma講金大枝o甘勞氣, 我反而覺得幾好丫。當班阿婆阿嬸冇人理, 得佢一個肯出頭, 呢d野抵佢賺既。

    不過調轉睇, 好好笑。係人都知中資銀行賣最多minibond, 所以民記一直唔敢掂‧呢幾日勢色唔對, 先攪果一兩次申訴, 點知鏡頭前, 全部係大海報/banner鬧渣打/星展騙子, 冇曬中銀....次次睇tv睇到o甘,我真係忍不住笑。

    呢單野, 明明唔係bonds話係bonds, 銀行真係有d串謀誤導, 而金管局/證監處 (?)既監管, 又可以容許呢d情況出現, 對如何售賣金融產品竟然毫無監管。
    就算佢地唔出聲, 消委會係咪應該出下聲呢 ?

    回覆刪除
  5. 我唔同意政府對一般買賣包底, 不過, 呢個case, 應該問:
    1. minibond成個銷售成份有冇誤導/欺騙呢 ?
    2. 如有, 政府在金融監管上是否失職呢 ?

    如果2成立, 政府/銀行要負責, 如果只是1 成立, 銀行要負責

    問題係, o甘複雜既case點可以分清責任 ? 我認為政府應該在傾唔掂數時, 選擇一兩個典型case, 資助受害人打官司。
    目標不為追討賠償, 而是攪清法律責任
    (這種做法, 在港英時期屢見不爽。)

    回覆刪除
  6. 唔敢留言俾渣老闆咋...怕冇point吖嘛!

    但我都覺得唔應該由政府賠囉d錢...

    回覆刪除
  7. 佢慘唔慘同應唔應該賠係兩回事丫,我仲慘啦,連百幾萬都冇,唔好話輸左百幾萬咯真係。

    回覆刪除
  8. 音語有親人成為苦主,所以可能有d biased.

    但正如篤篤篤撐講,銷售成份確係有D誤導, 而政府唔知係唔識定唔理,又完全無提醒市民風險。

    雖然家人出事但我都覺得係唔應該賠足。因為此例一開真係後患無窮。

    講真,如果唔係政治因素考慮同埋銀行真係有d做錯,D錢真係分分鐘渣都無呀,依家執返六成算執番身彩啦。

    話時話六七厘息真係買匯豐都有啦,照計匯豐穩陣好多卦...

    回覆刪除
  9. Hana姐真好彩!我家人就不幸中了ELI,數目不祥(唔敢問)。

    如果政府賠,到時有過百萬納稅人苦主上街遊行,老曾又要因腳痛提早休息。金管局/證監嗰班山寨王,只要銀行交齊文件,自然閉眼批出兼收錢,何來監管?

    其實不應叫「賠」,因為債卷仍有價,只是苦主要提早贖回債卷。

    回覆刪除
  10. 我唔駛搵人包底,如果政府肯"近"我d 股票6-7成, 我會劏雞還神! 加連聲多謝! 哈哈

    回覆刪除
  11. 呢次事件,
    令我想起彌敦道果D通常叫做「忠誠」既海味舖賣洋參。
    用大大個螢光牌寫住大大個「$20」o係個牌度,
    個「$20」字下面就寫個用顯微鏡先睇得清楚o既單位原來係「1克」。

    用o甘o既手法去賣,用o羊心態去買,
    你話邊個o岩邊個唔o岩?

    洋參性涼,人參性微溫,藥性本來就有別。

    出事了,無人認賬,可以怪誰?


    誰都會散 怎知一拍便會散
    怪我自己作反 明明我不應再揀
    忠貞怎可以貪 給拋棄亦已很慣
    不慣去承認自私 移情別愛太奸

    遲早要散 散得清脆未算慘
    我卻要忠變奸 斗膽一腳踏兩船 想上岸時又晏
    無面目再解釋 自廢了承諾是否太搗蛋




    野孩子上

    回覆刪除
  12. 校長:你薪高粮準梗係講得輕松啦!

    enigma ,人心不足蛇吞象吖!攞得返6、7成已經幾好啦!

    篤篤篤撐 :講下笑遮,十皮我都唔會去示威啦,成年人要為自己所做所為承擔責任。當然有得賠梗去攞架!

    火女:你呀,就係太多顧慮,凡事唔使諗咁多!想做就去做嘛!

    derek,我都好慘吖!唔該賠埋個廚房同廁所俾我吖!

    回覆刪除
  13. 音語兄:好耐冇見啦!幾時有心情同我食啱吖?

    依加啲'苦'主要十足喎!

    小龍:>如果政府賠,到時有過百萬納稅人苦主上街遊行

    到時叫埋我啦!


    行姐:你劏雞還神! 我就學柏芝奶奶跳草裙舞!

    野孩子:怪納稅人交稅太多囉!嘻嘻...

    回覆刪除
  14. 咁你幾時在香港呀?tomorrow?

    回覆刪除

淡极始知花更艷,愁多焉得玉無痕。

Related Posts with Thumbnails