再談價值投資法的迷思

Blog友 篤篤篤撐 係避開 一文留言：「兜小路返家, 唔單止可以唔駛在大跌市中塞死, 仲可以有成功快感, 話時話, 幾日賺左成皮野wor, 發死妳~~~」

覆覆下寫咗一大篇謬論，姑且貼係哩度等事過境遷後的自已反思。

價值投資法唔應該一味死守，就算個股基本因素冇變但大環境唔同咗就應該識走位囉！

大市升到上三萬人人都知情況不妙，價值投資法令我們信俸長揸不沽越跌越買，結果咪依加咁囉！

其實我嘅永久組合係冇蝕到本金嘅，包括宏到送嘅原始股(之後有分拆)平均價80幾蚊嘅匯豐，平均價6個零嘅地鐵，5蚊嘅中人壽，2個幾嘅中石油...

但點解大海嘯又會触及到我嘅臨界點呢？人係群居動物，所有嘅情緒包括快樂和悲傷都緣自於比較，我的永久組合價值相比起股市高峰期唔見咗一大截，所以我唔開心(或者係冇咁高興囉！)。

我的大大老闆也是價值投資法的信徒，不過佢係迷你果隻，所以佢冇做足，係大市三萬點時放盡哂所有股票包括由沙士時期儲返來的所謂'永久組合'大藍籌。揸佢一大筆錢泠眼旁觀，直至萬六點先再開始重新建立'永久組合'。一來一回唔使忍唔使捱就可以隨時到家，我認為咁先至係股神，真正的大贏家啊！