2009年3月10日 星期二

茶餐廳伙記

今朝係茶餐廳食早餐嘆報紙,有個似記對住張頭版話:「好野!匯豐都33蚊了,鬼唔望佢跌到仙都唔仙嗱,有錢佬抵X死。」

哩個伙計真係好阿嬌吖!竟然以為冇買匯豐股票就可以獨善其身。匯豐咁插法對成個香港經濟的負面影響係可以好深遠!

今早個相熟嘅地產經紀又打電話來話我上星期睇果層第一城樓個業主鬆口話可以平多5%俾我,因為個業主要平5仔倉等錢救命,我還咗口價平多10%即係比市價平20%。個業主話俾一日時間佢諗諗。

復活節假期諗住趁平和家人去東歐行下,上個禮拜8天團總企硬係八仟蚊樓上,今日再去睇已經平咗成仟蚊。個個職員都苦口苦面話少咗好多長線貴價團,收入大縮水,擔憂收入少又驚被裁員。

儲咗三年嘅NCB,趁住車保就來到期心思思想換駕四驅車來揸,哩幾日開始周圍去睇二手車,發現二手車展覽場的陰暗氣氛總勁過大酒店,睇車客少不在話下,果啲經紀的面色有幾個總好似明天就要上報紙一樣。

啲二手車多咗好多08年落哋、0手、幾仟咪超新淨嘅,价價錢只是新車的五份三到。眾所週知以前買二手車做車按的比俾哂錢嘅可以平多一、兩萬蚊,但依加俾現金一樣有得平。好多經紀話好耐冇開單了,貼咗自己半份佣都要做啦!再咁落去要去茶餐廳做跑堂了。

如果中產都變成窮人,原本的窮人只會更加窮,哩個道理唔係人人都明白!

41 則留言:

  1. 唔單只茶餐廳伙記,上仆睇好多話自己無揸匯豐既人都一樣啦.

    係呀依家買車好抵呀,不過好似第一日識你都聽你講話換車喎... 今次認真?

    回覆刪除
  2. 今次好認真!(其實又好矛盾,咁嘅時勢喎!換車驚唔驚俾人打呢?)

    我見到兩駕同你老婆一齊落地嘅姊妹吖!

    音語兄有冇好介紹?

    回覆刪除
  3. 所以咪話咯,唔明理嘅人大把,腦筍未生埋嘅人大把,連自己都照顧唔到嘅人又大把,唔自愛嘅人又大把,貪心嘅人又大把,但佢地都有一票喎,咁樣嘅公平投票權,壞事多過乜,你愛嘞!

    回覆刪除
  4. 呀美人,

    香港很多憎人富貴厭人窮的人, 目光又短視; 其實正如妳文中說, 經濟環境是扣扣相連嘅, 有啲人是看不到的, 因其負能量, 所以這種人就會是永生注定係窮人(可以是錢財亦可以是心靈的貧窮)囉 !!

    ps : 妳嘅五號仔, 在倫敦哩兩日都超左 3 個月的平均交易量成倍幾; 很明顯班狼(歐洲基金佬)平僅倉, 但...最怕佢地想拉高翻少少價位, 再質短多一次(短嘅最常用招數)...
    唉...妳與我媽同條船囉 !!
    祝好 !!

    回覆刪除
  5. 個人覺得 在這種非常時期, 為了金融市場的穩定性, 競價盤時段是否可以暫停

    回覆刪除
  6. 校長:咪咁勞氣啦!輸少當嬴。

    過客:你冇跟啲留言哩,我係$45.6沽咗兩手(蝕咗成9000銀),剩返果千幾股平均價成100蚊暫時冇諗住止蝕。

    回覆刪除
  7. Jean ,啲勁假時段方便造市搵食,啲鱷魚點肯呢?:(

    回覆刪除
  8. I was reading the Norwegian newspaper today. Rolls Royce fired 210, another ship company fired 150. In total, Norway has closed to 70,000 unemployed. It is looking darker and darker.

    回覆刪除
  9. 在這個非常時期,家下呢個時勢,唔好理咁多好過,都係有得食好食,有得駛好駛算把喇。

    回覆刪除
  10. Desertfox ,嘩,燒到去挪威添吖?!睇來哩次L型底都要好耐先有得爬升了...

    Ebenezer ,嗯,今朝有酒今朝醉都幾好。

    回覆刪除
  11. 你筆直幾多先?係唔係一定要四驅?如果係Lexus 水貨,即係Harrier, 幾抵買。 2400cc 應該夠用。

    回覆刪除
  12. 原本5手匯豐再加我駕舊車,依加睇怕都要十手八手先得了!

    IS250又好似好型喎!前日睇咗駕幾新淨可惜車尾好似撞過。

    豐田嘅SUV又好唔好呢?

    回覆刪除
  13. 豐田嘅SUV係唔係即係RAV4? 始終我覺得Lexus係高一條line.

    IS250又唔係四驅喎... 如果撞過就無謂了。

    回覆刪除
  14. 有啲人嘅無知,係自己攞黎嘅,會令人鄙視;但係亦有啲人嘅無知,係環境因素影響多,係值得同情同體諒。

    回覆刪除
  15. 就係咁既見識所以佢買唔起囉!

    回覆刪除
  16. 好同意。D 人以為自己冇買好lucky. 痴的。

    回覆刪除
  17. 新款IS250個尾仲正!快D換啦...
    四驅千其唔好買BMW X5,好易壞!
    BMW 5系好好揸,依家好抵.
    我早兩星期續車保,計落貴過上年....頂...

    回覆刪除
  18. 音語兄:我唔想再買新車了,落地唔見三份一,而且啲幾仟米嘅二手車同新嘅差唔多。
    我咪吼緊Harrier, 2400cc 囉!但見IS250又好似好型咁又心思思咁囉!(女人係麻煩啲:))

    小朱:所以作為匯豐苦主我咪冇當面插佢囉!寫扑講下就算。

    老人:依加一手5仔都唔係好多錢遮:(

    阿ta ,淺薄係咁啦!

    馬沙兄:我哋撈偏嘅最咒忌揸寶馬啦,以前揸過Z3又係成日壞。

    乜車保貴咗咩?:(

    回覆刪除
  19. 我想問o的細路仔問題...『0手』即係咩? 新車呼?

    回覆刪除
  20. 0手即係未轉過手嘅,即係得一個車主,如果我買咗0手嘅二手車再賣俾第三個人咁就係1手車啦!

    回覆刪除
  21. 不如諗諗北美版嘅IS250AWD, 咁咪又型又有四驅囉, 不過左軚喎..

    同意音語兄之言, RAV4同Harrier, 真係差幾級.

    回覆刪除
  22. 你...你...你一定係身痕定了

    回覆刪除
  23. 我又...唔介意大家一齊窮囉...我硬係覺得,窮啲,精神上先會富足啲...(咁大前提梗係,窮得泥都仲有份工做啦)

    回覆刪除
  24. 米兄:有份工做?工都分好多種喎!五、六仟蚊份工你介唔介意呢?如果係咁你總會唔會生米B女呢?

    然則我始終都認為心靈富足比錢更重要,所以身家大縮水我一樣瞓得安食得香。

    回覆刪除
  25. 關於保費,我買全保,車價(全保額)下調幾萬,NCB儲多一年,但錢同上年差無幾,咪即係貴咗!

    撈偏嘅最咒忌揸寶馬! 唔明,點解?

    我都係唔再買新車,落地唔見三份一,有D唔止...

    回覆刪除
  26. 原來係咁。

    寶馬唔老泥吖嘛!威猛哥啲手足歐洲車中意奔馳吖!

    係吖所以要吼二手車。

    回覆刪除
  27. 似乎馬沙個case 係保險公司比個discount 細左. 我個case係discount同ncb一樣, 保額少左, 所以保費平左.

    hana 你都係同一間保險公司, 保費應該都會平d. 唔係咪又轉另一間囉.

    回覆刪除
  28. 舊年都夾過價都係哩間平喎!

    係了總未請你食飯多謝介紹添。

    回覆刪除
  29. >>寶馬唔老泥吖嘛!

    點唔老泥呀?

    寶馬出名小毛病多,怕麻煩就的確係奔馳好啲嘅,但係外型就點都係寶馬型過奔馳多多聲喇。

    都係揀IS250 喇。

    回覆刪除
  30. 好矛盾呀,房車揸得多未揸過四驅想試下趁依加平嘛!但黑色IS250又好型喎而且貨源充足...

    回覆刪除
  31. 我哋撈偏嘅最咒忌揸寶馬 <- ???

    回覆刪除
  32. 穷人, 很多时候知识不高, 不明不白好自然啦.

    回覆刪除
  33. 唔好買黑色呀,唔洗車好恐佈架!試過一次,怕怕!IS250白色全包圍好型喎!

    保險我比較過啦,我用嗰間算最平之一!

    又,寶馬出名小毛病多係誤解喎,我覺得同M.BENZ差不多。我依家個架揸年幾都係換咗3個ABS Sensor!主因仲要係ABS Sensor包膠係用環保物料,會隨時間自然分解。

    好多人話歐洲車小毛病多係誤解,因為新一代歐洲車全車由不同Sensor及電腦覽察,小至軚氣唔夠都著燈。查實好多小問題去相熟車房插電腦消CODE就得,唔駛錢!

    回覆刪除
  34. 另外,除咗一兩個二手場如灣仔,其它多數係鬼場,好易奶嘢!

    Harrier直版比較多,IS250 好難揾直版!

    回覆刪除
  35. 馬沙兄:我駕日本車揸咗三年乜都冇換過吖!之前揸歐洲車電子成日有小毛病都幾煩。所以依加中意日本車多啲,雖然鋼水冇歐洲車咁好。

    又:你又唔係匯豐苦主做乜鬼4點幾總唔瞓?身子緊要吖!

    回覆刪除
  36. 4點幾總唔瞓....因為剛剛收工...依家又開工 >_<"

    回覆刪除
  37. 啊呀!啲錢真係唔易搵吖!

    (抱抱)

    回覆刪除
  38. >>寶馬出名小毛病多係誤解喎,我覺得同M.BENZ差不多。

    可能我唔好彩喇,我嘅經驗比較的確係咁,而且講緊嘅當然唔係著燈嘅問題喇。

    要穩陣,就梗係歐洲車好,要好揸,都仲係日本車。不過成日喺啲交通意外見到啲日本車撞到變左一箸菜咁,真係好心寒。

    回覆刪除
  39. 小朱:總之就各有勝負啦!但啲歐洲車安全得來又好鬼敏感喎,大力啲剎車都會彈個氣袋出來...

    回覆刪除

淡极始知花更艷,愁多焉得玉無痕。

Related Posts with Thumbnails