2009年2月20日 星期五

阿Ann辭咗工

正月十五還未過,去相熟的美容院做facial,讓我的御用美容師JJ拿封利是給阿Ann,JJ很無耐地說:"阿Ann辭咗工。"我有些愕然,咁嘅時世辭工?

阿Ann(化名)今年ニ十歲,180磅的肥妹仔,十六、七歲就雙失,走咗去讀了個政府展翅(亦或係毅進?)課程學美容。阿Ann學完個課程之後,我朋友家姐Bobo開的美容院請咗佢實習,月薪四仟,其中二仟蚊由政府俾,為期一年。Bobo開咗幾間蚊型連鎖店做街坊生意,經營得唔錯,阿Ann在其中一間我經常去的店工作。

這個年頭很多讀書不成的妹走咗去做美容,但好多都怕辛苦做唔長久,做到三個月果啲已經叫做耐了。小店裡唯有JJ和店長阿Win兩個師奶美容師是固定的,其他妹車輪咁轉換完又換。阿Ann係80後中做得最長時間嘅,都係一年到。兩個師奶都好錫阿Ann,事關佢雖然有點盾盾哋,但聽教聽話又有禮貌,總唔介意和她們分享內心秘密。而我就覺得肥嘟嘟的阿Ann好可愛,做4次Facial有1次會搵佢做,當係鼓勵新人,雖然佢啲手勢認真麻麻。所以當Bobo話唔想同阿Ann續約的時候,我同兩個師奶都有幫佢求情,結果Bobo決定繼續請佢人工加到五仟。

點知未夠一個月,農歷年剛過,JJ放完假返來,Bobo好勞氣咁同佢講:"阿Ann今早打電話返來,話辭工喎!!!問佢為乜,佢話好累要抖下先,手續都唔知幾時辦。"

JJ一向當阿Ann係妹咁看待,立刻打電話質問阿Ann點解咁冇交待?勸佢好來好去快啲返鋪頭搞清啲手續,第時想做返都有得講下。"但阿Ann冇再出現過。

阿Ann的媽媽是汕頭人,嫁咗俾阿Ann爸爸先至來香港,轉眼都有七、八年了,曾經試過去酒樓洗碗,但人哋話佢洗得太干淨炒咗佢,從此一家四口靠綜援為生,阿Ann同JJ話綜援都有萬鬆啲,阿Ann的妹妹讀緊中學,另外總有書薄、校服、交通、午膳等等津貼。因為阿Ann的收入,社署會減咗佢哋一家的綜援金額,所以阿Ann個40幾歲的爸爸成日勸佢唔好做哩份工,話又唔係多好多錢。

阿Ann好似時下的年輕人一樣中意上網煲劇、聽歌、打機,往往至半夜,第二朝返工就同JJ話好累啊,好累啊!

JJ係個嫁來香港的四川妹,育有一子正讀小學,一家三口在深圳居住,早晚過關返工、回家,係個樂天又勤奮的新移民師奶。JJ話佢同阿Win成日都會帶飯,但人工少佢哋一半有多的阿Ann就成日食親啱都三幾拾蚊,勸佢節省啲,勸极都唔聽,或者阿Ann辭咗份工都係好嘅。

延伸閱讀: 綜援養懶人

20 則留言:

  1. 哈,Hana姐,好巧啊,我也剛前寫了一篇類似的.
    因為睇到新聞又話要倒貼大學生,我真係覺得條氣好鬼唔順.

    回覆刪除
  2. 你話唔想辦法走緊啲稅點得吖?我宁願用自己的方式去幫/輔助我認為值得幫/輔助的人。

    回覆刪除
  3. > 人哋話佢洗得太干淨炒咗佢
    唔係化?

    回覆刪除
  4. 唉……無言。
    有時候,基程度,有什麼的父母,便有什麼的子女。
    我看不到阿Ann的未來,亦已看到香港的未來。

    回覆刪除
  5. 市場維京人 :係吖!即係佢洗得太慢,人哋洗咗三盤,佢一盤都未洗完。

    ebi ,當日我其實幾嬲下,Ann白白淨眼大大,但衰在實在太肥,見佢聽話聽教個個都想幫下佢,因為佢的身型係華人社會注定冇仔吼...

    唉...

    回覆刪除
  6. 綜緩於中/青年---折人心志,讓人萬劫不復,看似糖衣...實則毒藥!
    但社會就是如此,難度吾交稅?

    回覆刪除
  7. 有甘既家长, 就算嗰女仔想努力, 都好难!

    回覆刪除
  8. 唉,作為八十後一份子,聽到呢d真係妏爭...

    做人啊,最緊要自己爭氣!

    回覆刪除
  9. 聶秀康 :所以咪唔葛囉!我交好多稅吖!!!

    小瓶子 :惡性循環!

    C+ ,你係正面果啲點同呢?!

    回覆刪除
  10. 我成日諗, 綜援其實唔多, 靠佢過生活真係冇啖好食, 點解仲有人會諗住靠綜援唔搵野做呢 ?

    其中一個因素, 我估係因為現在低下層既人工實在太少, 同攞綜援差不多, 所以做唔做分別唔大。
    另一個原因, 係依家晉升既機會唔大。同70年代唔同, 果陣唔識字只要肯努力, 捱捱下就有機會出頭; 依家, 捱足十年都只不過原地踏步。於是, 又係果句, 不如唔撈攞綜援好過。

    上述logic, 係想講有時民心呢樣野, 其實關社會結構事, 政府既policy, 搞足十年都唔朝呢個方法發展, 仲可以點丫, 我地 ?

    回覆刪除
  11. 疊埋心水等攞綜援?
    財政司呼籲大家踴躍發表意見喎!

    回覆刪除
  12. 如果讀得完展翅,毅進,IVE等,都好過無,大把人交了學費上了兩個月課就退學。其他人吸煙打機開party就是上課時間常做的事。

    四千蚊請個年青人,遲到no show是平常事,做過三個月已是少數人。

    坊間有些零售飲食業,容許兼/全職出現金不留人事及報稅記錄,當然冇MPF。正如張建宗講,長期有人冇工做,有工冇人做!

    回覆刪除
  13. diu.. 所謂四千加到五千,其中二千仲要係政府俾,你想人地要幾多謝呢個所謂老闆 Bobo 姐呢?

    呢啲人工低冇前途既工,冇人會有心機做。俾你做都係一樣。有些少積蓄餓唔死己經自然會想休息下。搵個第二份撞下運氣唔好?事關都好離再差

    回覆刪除
  14. Ann得o個廿歲, 個個都貪玩. 工作嫌辛苦, 再加上有個咁既亞爸"鼓勵"佢唔返工, 咁....咪攪成咁咯.

    唯有祝Ann 早日開竅!!

    回覆刪除
  15. 篤篤篤撐 :做野都冇綜援咁多錢,俾我都唔做啦!我係路X會做義工跟進的果啲單親綜援,個媽媽會去派傳單,23元/h,幫補下,香港地想改善生活一定唔懶得。

    李小龍 :咪係!都係綜援政策唔貼市的後果。

    鎚 鎚 :你咪係唔係都diu..啦!假胸又唔理,假面又唔理(你果個藍莓天使整容前後真係...)

    四仟係底薪來遮,每做一個客都有佣收(當然因應資歷有所唔同),理論上冇客搵佢做,佢就使做野等收工啦!所以我先會「做4次Facial有1次會搵佢做,當係鼓勵新人」。所以Bobo果二、三仟蚊分分鐘跌落咸水河!所以Bobo話想炒佢囉!

    美容師都係一項專業來!做得好有熟客萬幾二萬蚊唔成問題!如果把口識講識sell產品,一個月搵幾皮唔成問題!(嘩,答你要寫咁多,請食飯啦你)

    回覆刪除
  16. 我都相信行行出状元, 如果好有心去做, 再学埋化装, 然后私下帮人化去ball嗰D装, 都有可能再赚多D 架, 反正美容院系轮住放假, 有可能调到D 假期来就...

    回覆刪除
  17. 好黑人憎囉。

    我努力工作, 我有交稅, 點解要養埋依d人!


    呀>>>>>>>>>>>>>>>>>>>>>>>>>

    回覆刪除
  18. 香港又無第二產業,又無高端產業,人口質素同教育質素滯後,唔配唔對,唔湯唔水,死局架啦!

    回覆刪除
  19. 小瓶子 :咁就難啲,但勤勤力力搵三餐好易!

    JC,係吖係吖!

    校長:咁又唔死梗悲嘅。

    回覆刪除

淡极始知花更艷,愁多焉得玉無痕。

Related Posts with Thumbnails