2009年2月18日 星期三

爾虞我詐~大家都是戲子

原來現實生活中我做戲都好叻下。

昨晚由本人做主角上演一場大龍鳳,成功將間裝修咗一半的屋以高過市價百分之十的價錢賣出。開心得我吖!

賣樓要訣:

1)包裝
無論賣或者租之前一定要執執佢先,唔好聽經紀話唔執而慳返啲裝修錢,事實証明裝修費係一定可以攞返有凸嘅。情形類似一個啱係鄉下出城做的妓女唔識扮靚淨係收得果一、二百蚊,執一執化個靚妝、穿得似樣啲,各位嫖客五、六百蚊都即磅。

經紀的如意算盤是,以你間屋舊、殘為由壓你價同埋可以快啲有盤在手。

2)唔急
賣樓同搵男/女友一樣,千其唔好急,萬一真係急都唔好俾經紀知,如果做唔到就要搵個深藏不露的親友出面幫手和經紀接洽。

3)唔簽獨家
放盤時要盡量搵多啲唔同地產公司,小型、蚊型都要搵,因為地頭虫生存得到,始終有佢嘅優勢,做獨家點都唔及得大小通食機會多。

4)唔放鑰匙
唔好放鑰匙俾經紀,想賣高啲價一定要親力親為,能說會道就最好了,自己人係度可以幫埋口,秘訣係間唔中都要彈下間屋有啲咩不足掛齒的缺點。就算自己不善詞令都好,至少可以監督個經紀有冇亂講說話。有啲經紀會為咗sell另外個盤而盡踩你個盤,雖則都係搵食手段來遮,但傳傳下你間屋分分鐘賣唔出,咁就唔好益佢了。力不到不為財,辛苦啲都要啦!

5)欲拒還迎
到咗真係傾得成了,價錢要企硬,買家的任何理由都不能成為你減價的理由。價錢合心水,心裡高興面上要猶疑,哩一分鐘未簽臨時買賣合約,下一分鐘都可能賣唔成。打好哩場心理戰的關鍵在於掉轉身份,要令對方相信下一個出價更好的等緊你,搵人做媒係一個好辦法(我尋日就有搵)。欲拒還迎佢急你唔急,啦啦聲簽字果個反而係佢,就算之後再後悔佢都無耐何了,除非肯撻定,情況有啲似愛上之後先發覺自己係第三者,唔愛都愛咗了,冇辦法止蝕的話唯有啃埋落去。

27 則留言:

  1. >>以高過市價百分之十的價錢賣出
    恭喜哂!

    回覆刪除
  2. 有時向異性推銷自己的方法都差不多, 欲拒還抑愛情的探戈角力

    不過我還是喜歡在最早的時機直接的說「我喜歡妳」

    回覆刪除
  3. >>>搵人做媒

    好奸哦...哈哈!!

    回覆刪除
  4. 你所講嘅唔急同欲拒還迎,喺現實生活裡面其實好多人都經常用,係好普遍的情況,由男女間嘅關係,到生意洽談,以至日常買嘢講價,都有。唏,不過你用愛上之後先發覺自己係第三者...唯有啃埋落去黎比較,就似乎牽強左啲喎(雖然你已經好醒目寫話"有啲似")!

    講番賣樓,有一樣你提得好嘅,就係唔好簽獨家。有啲人經驗唔多、或者唔熟悉地產運作,諗住淨係揾啲出名嘅地產代理會穩陣啲,(講真有啲出名嘅好多時仲衰呀,Mr. C 果間已經入左我黑名單喇。)其實好多時啲小型代理因為要維持競爭力,提供嘅服務往往仲全面同周到,彈性又會大啲。

    總之買樓賣樓,對好多人黎講,講緊嘅好多時可能就係一生嘅積蓄,如果自己冇經驗,最好盡量問多啲人取經,睇吓有啲咩地方要特別注意,就唔會咁容易出事。

    有人話"千金難買心頭好",於是一見到鍾意就扑到去簽約、俾錢,往往連層樓都冇望真。老實講,呢句說話喺有錢人身上會用得著多啲,因為就算有咩問題都完全唔會傷身、傷心;普通打工仔,就要三思,真係唔好太心急扑鎚呀。

    回覆刪除
  5. 卡臣:多謝!

    Unreality 泡影 :我都係吖!皆因冇咩人追
    我,唯有我追人。

    火鶴 :男人就咁係中意啦!

    小瓶子:冇辦法了要向現實低頭,其實好多經紀都會搵人做媒!

    小朱:你講得有道理,即刻改咗下,你睇下收唔收貨?

    回覆刪除
  6. 娜姐:

    恭喜晒!
    你唔講真係唔知呢d技巧!! 多謝分享.

    回覆刪除
  7. 我梗係覺得, 其寳你呢篇係講緊兩性關係, 「包裝, 唔急, 唔簽獨家, 唔放鑰匙, 欲拒還迎」

    回覆刪除
  8. 薑是老的辣,大姐果然厲害! XD

    好多好似都係老生常談不過唔少人都忽略左,例如"一個啱係鄉下出城做的妓女唔識扮靚淨係收得果一、二百蚊,執一執化個靚妝、穿得似樣啲,各位嫖客五、六百蚊都即磅"道理好多人都知,不過好多鐵公雞要佢先畀一個幾毫都好似要剝佢層皮咁!

    講番正題,咁大姐幾時請食飯?

    回覆刪除
  9. 行行:好野咁係要分享啦!我都係睇咗你寫韓國士多啤棃先走去買!

    火鶴 :嘩,你百寶箱上身吖?真係似喎!等我加返個標簽先。

    老人:我讀中史出生,引經據典最耍家,拋磚引玉嘛!
    搵日搵齊人吖!

    回覆刪除
  10. 好,如果有天我賣屋一於搵妳做媒

    回覆刪除
  11. 嘩... 真係唔好同女人講價~
    或有女波士者也要小心!!!

    回覆刪除
  12. Desertfox ,冇問題

    imak ,唉,人在江湖我都係被逼格遮...

    回覆刪除
  13. 呵呵,同你交手真係輸面九成。

    驚驚!

    回覆刪除
  14. >>以高過市價百分之十的價錢賣出
    請食魚翅 !!!!!!!!!!!!!

    回覆刪除
  15. 好實用呀!不過家下我未有樓賣,可能用番呢 D 橋嚟買樓,估下賣家諗乜都好喎。

    回覆刪除
  16. 校長:好哋哋做咩要交手喎!

    篤篤篤撐 :冇問題

    JC,嘿嘿,,,

    老人:你...

    回覆刪除
  17. 恭喜娜姐又多d本投資, 祝個銀紙波越滾越多, 一球球咁碌返黎!

    回覆刪除
  18. 你话写番篇文讲点解开头不喜欢我哦, 快D 写啦, 等住睇!

    回覆刪除
  19. C+ ,多謝!下次去馬場單聲吖嘛!果日我都係馬主厢房呀,早知搵你飲返杯吖!

    小瓶子 :你又來了,怕咗你,等我借完庫返來就寫好冇?

    回覆刪除
  20. 搞錯!!! 又緣慳一面? 我尋晚都係七樓賭到落沙圈... 你有無入場?

    下星期我應該都會去,不如我地約定飲支Henri Giraud... :p

    回覆刪除
  21. 我冇賭吖,都係應酬先會去。下星期返大陸打波(又係應酬:()唔去得呀!

    回覆刪除
  22. 嗚~娜姐真忙!但以後入場又多樣野做-要搜索娜姐既身影!

    回覆刪除
  23. 我好易搵,唔係全白就全黑,黑色闊褲樽領貼身背心(加外套),白恤衫白裙。hehe

    回覆刪除

淡极始知花更艷,愁多焉得玉無痕。

Related Posts with Thumbnails